SECTIONS
Sunday , May 20, 2018
SUPERBALITA CEBU

Nalambigit sa drugas bantayan

MIPASIDAAN ang Mandaue City Police Office (MCPO) nga ngadto sa mga kandidato nalambigit sa drugas nga nidaog sa milabayng barangay election nga mokooperar sa kapulisan ug kagamhanan sa dakbayan sa paglimpyo sa mga pangan niini.

Kini human duha sa 11 ka mga kandidato sa Barangay ug Sangguniang Kabataan (SK) election ang nidaog sa piniliay.

Ang duha ka mga opisyal nga gikan sa Brgy. Centro ug Brgy. Mantuyong parehong nitahan na niadtong MCPO niadtong Disyembre 2016.

Base sa record sa MCPO, ang duha parehong tiggamitan og ilegal nga drugas.

Matod ni P/CInsp. Mercy Villaro, information officer sa MCPO, nga padayong monitoron sa MCPO ang mga opisyal.

“Silang tanan (naa sa watchlist o wala) is under monitoring gihapon, under verification gihapon sa ilang mga names kun naa sila into drugs gihapon. Sa atoang mga nangandidato, sa atoang mga Mandauehanons ilabi na sa atong watchlists, kahibalo man na sila kun si kinsa sila, so para mahapsay ang tanan, mo-cooperate sila sa PNP ug sa atoang local government unit and to prove nga wa gyud sila magbuhat og binuang,” matod ni Villaro sa mga tigbalita.

Pahimangno ni Villaro nga mas maayong mopaubos ang duha ka opisyal sa community-based rehabilitation aron ang resulta niini ilang ipasa didto sa Philippine Drug Enforcement Agency (PDEA 7).

Paambit niya nga bugtong ang PDEA lang ang makadeklarar nga drug-free o wa na malambigit ang usa ka personalidad sa iligal nga drugas.

Kahinumduman nga nga si Mayor Luigi Quisumbing niawhag sa mga botante sa Mandaue nga di botaran ang mga narco-politicians.

Sa dihang nahinabi sa mga tigbalita sayo ning semanaha, ang mayor niingon nga pabiling tutokan niini ang krusada batok drugas.

Gihagit ni Villaro ang mga anaa sa watchlist nga pamatud-an sa ilang buhatan ug sa City Hall nga wa na kini malambigit sa drugas.

Sa laing bahin, sukad sa implementasyon sa gun ban niadtong Abril 14, moabot na sa 13 ka mga tawo ang nasikop sa MCPO nga nilapas sa Comelec gun ban.

Sa 13, unom niini ang nakuhaan og hait nga hinagiban ug ang pito niini armas ang nakuha. (JPP)


VIEW COMMENTS