NAGPASALAMAT ang kapulisan sa Cagayan de Oro City Police Office (Cocpo) sa malinawon sa bag-ohay lang nga natapos nga Barangay ug Sangguniang Kabataan (SK) eleksyon tungod kay wala’y mga dagkong insidente ang natala.
Hinuon adunay mga minor insidente lang ang natala sama sa pagbinayluay og mga hait nga pulong nga nasulbad ra usab.
“Diri sa Cocpo wala man ta’y natala nga mga bayolente nga mga insidente gawas lang atong medyo mga init nga pagsinultiay ug reklamo sa usa ka Barangay sa Cagayan de Oro,”
"Nagpasalamat kita niana nga ang atong katawhan niduyog lugar sa paghimo sa atong Barangay and SK election nga mahimo gyung malinawon,” matod ni Police Superintendent Mardy Hortillosa,tigpamaba sa Cocpo.
Mapasalamaton usab ang kapulisan sa Commission on Election (Comelec), Cocpo, Armed Forces of the Philippines (AFP), local government unit (LGU) labaw sa tanan sa katawhan kinsa aduna’y dakong papel aron nga mamahimong malinawon ug hapsay ang eleksyon niadtong Mayo 14.
Nasayran nga aduna’y siyam (9) ka mga personahe (usa niini gikan sa Station 6, lima sa Station 10 ug 3 sa Station 3) ang nasikop human nakalapas sa liquor ban, ug laing upat usab ang nasikop human nga nakalapas sa Comelec gun ban.