PITO na ka mga midaug sa Sangguniang Kabataan (SK) ning dakbayan sa Cagayan de Oro sa bag-o lang nahuman nga eleksyon ang diskwalipikado na tungod sa problema sa edad.
Gilangkuban kini sa tulo ka SK chairman ug upat ka SK member diin duha niini ang wala pa naproklamar.
Nasayran nga upat sa pito ka mga mananaug ang naproklamar gyud hinuon apan karong panahona gitaho na kini sa buhatan sa Department of Interior and Local Government (DILG).
Basi sa taho sa Commission on Elections (Comelec), dakbayan sa Cagayan de Oro, ang pito ka mga opisyal sa SK mao sila si Ian King March Pimentel Miyake, SK chairperson sa Cugman ug Michelle Jose Tamparong, SK member sa Barangay 25 kinsa wala pa naproklamar samtang ang mga naproklamar na mao sila si Samson Roa, SK chairperson sa Barangay Tumpagon; Darryl Jay Romero, SK member sa Barangay 32; Jocell Lauderes, SK member sa Barangay 21; Agustine Laron, SK chairperson sa Barangay Indahag ug John Baltazar Joaquin, SK member sa Barangay Bonbon.
Nasayran nga una na nga nakadawat og suspension order o suspend the effects of proclamation ang buhatan sa Comelec niadtong milabay nga adlaw kalabot na sa pipila ka mga midaug nga dunay problema sa edad.
Giklaro usab sa Comelec nga una na silang nagpahimangno sa pagduso pa lang sa mga kandidato nga kadto lamang anaa sa sakto nga edad ang mahimo nga magpapili.
“At the time nga nag-file sila sa certificate of candidacy aware ni sila dinhi sa atong opisina,” pahayag ni Atty. Ramil Acol.
Dugang ni Acol nga pipila nuon ka mga kandidato ang mi withdraw sa ilang kandidatora human nga gitambagan nga dili kini qualified sa pagdagan. Apan aduna gihapoy nanagad ug wala silay mabuhat sanglit ministerial man ang ilang duty.
“Underaged ka man, wala man ka kaabot sa 18 anyos, unsa man imong plano? Karon nga posible man gyud ka nga makasuhan ang uban nisanong sa atong estorya nga nakasabot wala nagpadayon, ang uban ning withdraw,” dugang pa niini.
Sa balaod ang nag edad lang og 18 anyos hangtod 24 anyos ang mamahimo lang nga modagaN pagka SK.
Sa pagsulat niini nga balita, padayon pa ang Comelec sa paghan-ay sa nahimong resulta sa nilabay nga eleksiyon.