DAVAO DEL SUR -- Andam ang Commission on Elections (Comelec) sa probinsiya nga modawat og reklamo batok sa mga kandidatong namalit og boto atol sa Barangay ug Sangguniang Kabataan (SK) elections niadtong Mayo 14.
Sumala sa botanteng si Maricel sa Barangay Zone 1, Digos City, nakadawat siya og sample ballot nga adunay nakaputos nga P200 nga gisukip niini.
Matud niini nga gisulti pa sa naghatag kaniya nga angayang mag-vote straight sila sa nga mga ngalan nga anaa sa sample ballot.
Sa Barangay Zone 3, gibutyag sab sa usa ka ginang nga si Marites (apilyedo gitago) nga nakadawat sila og tulo ka kilong bugas gikan sa usa ka nagpapili nga pagka-kagawad bugti sa pagboto niini.
Nahitabo sab ang reklamo sa pipila ka mga botante sa Barangay Poblacion Uno sa lungsod sa Bansalan human matud pa adunay nagpasubli nga kandidatong naghatag og tag P20 mil sa pipila ka mga purok lider aron maseguro ang kadaugan niini.
Sa Barangay Managa sa samang lungsod, giingong mismong usa ka opisyal sa probinsiya ang natulog sa usa ka balay aron mismong siya ang mokampanya sa gisuportahang mga kandidato sa lugar.
Milibot sab kini sa mga barangay sa lungsod aron personal nga manghatag og salapi bugti sa pag-suporta sa ilang mga kandidato.
Sumala ni abogada Maria Febes Barlaan, provincial election supervisor, mahimong i-submitar sa ilang buhatan ang mga ebidensiya sama sa video o hulagway sa pagpamalit og boto aron mahimong bug-at ang ebidensiya batok sa mga kandidato.
Mahimo sab nga isang-at ang kaso sa buhatan sa piskalya o kaha ipada sa law office sa Comelec sa kaulohang Manila.
Usa ka criminal offense ang pagpamalit og boto ug mahimong mapriso sa di moubos sa usa ka tuig ug di molapas sa unom ka tuig ugaling mapamatud-an nga nakalapas ug mahimong ma-diskuwalipika sa paghupot og posisyon sa gobyerno ug di na tugtang makaboto. (Orlando B. Dinoy)