MAGUINDANAO PROVINCE -- Pito ka mga tag-as nga matang sa armas ang nakompiska sa gilusad nga zoning operation sa mga awtoridad alas 8 sa buntag niadtong Miyerkules, Mayo 17.
Gibutyag ni Datu Montawal chief of police, Senior Inspector Rasol Pandulo nga nagpahigayon sila og zoning operation sa Barangay Dungguan, Datu Montawal sa nahisgutang probinsiya human miulbo ang panag-engkuwentro tali kang incumbent Kapitan Salaban Mindalagat ug ang midaug nga kapitan nga si Saprola Buday.
Gatusan ka pamilya ang mihikling paingon sa luwas nga dapit sa kahadlok nga maipit sa kagubot.
Nahunong lamang ang engkuwentro sa magkaaway nga pundok sa diha nga gi-mortar sila sa mga sundalo.
Usa ang patay ug usa ang naangol sa sinukliay og mga bala tali ni Mindalagat ug Buday.
Atol sa zoning operation sa kapulisan ug mga sakop sa 7th Infantry Battalion, Philippine Army, ilang nakuha ang pito ka mga tag-as nga matang sa armas sulod sa mga balay nga gi-abandona sa mga namakwit nga sibilyan.
Abtik nga milihok sila Vice Mayor Datu Otho Montawal, Mayor Datu Vicman Montawal, mga miyembro sa Sangguniang bayan ug mga barangay opisyal, uban ang tabang sa militar, kapulisan, mga Muslim elders apil na MILF Ceasefire Committee diin nagpahigayon kini og malinawon nga negosasyon.
Nagginakusay sila Buday ug Mindalagat nga magpayente lamang ug nagkasabot nga tapuson ang ilang bingkil alang sa kalinaw ug kalamboan sa Barangay Dungguan.
Apan padayon pa ang gihimong imbestigasyon sa mga armas nga nasakmit sa mga awtoridad. (Edgar E. Fuerzas)