SECTIONS
Sunday , May 20, 2018
SUPERBALITA CEBU

Rockets mibawos; Warriors gikulata

Asa ka? Si Stephen Curry (wala) sa Golden State Warriors nga nangita og paagi nga malikayan ang depensa ni Clint Capila (tuo) sa Houston Rockets niining aktohay atol sa Game 2 kagahapon sa Wes­tern Conference finals sa National Basketball Association (NBA). (AP)

SUKWAHI sa gituohan sa kadaghanan, gibawsan og makabungog nga kadaugan sa Houston Rockets ang defending champion Golden State Warriors, 127-105, kagahapon sa Game 2 sa ilang Western Conference finals aron tablahon ang series, 1-1.

Ning higayona, ang panagkumboya nila ni James Harden ug Eric Gordon kinsa mipakli og tag 27 puntos matag usa, maoy nahimong mahait nga hinagiban sa Rockets kinsa wa gyud mobuhi sa ilang labaw gikan sa first quarter hangtod na sa katapusang hugna.

Balansing ataki maoy paghulagway ni Houston coach Mike D’Antoni sa gihimo sa iyang mga batos.

Si P.J. Tucker midugang og 22 puntos nga maoy iyang career-high sa playoffs, ug 19 puntos usab ang natampo ni Trevor Ariza kinsa wa makapakita og ayo sa Game 1.

Ang pambato sa Warriors nga si Kevin Durant kinsa mikudlit og 37 puntos sa Game 1, kagahapon mipabuto og 38 apan ang kapugdol sa opensa nila ni Stephen Curry ug Klay Thompson maoy dakong rason sa ilang kapildihan.

Ang duha igo lang nagkumboya lang og 24 puntos - otso kang Thompson ug 16 puntos ang nahimo ni Curry.

“We can beat anybody, anywhere at any time playing the way we play,” matod ni coach Mike D’Antoni.

Si Tucker mipadayag nga ang ilang depensa maoy ilang gisandigan og maayo aron mapugngan sa ilang mga ataki ang Warriors.

“I never worry about my offense ... it’s all on defense,” ingon ni Tucker. “If we get stops we’ll be able to run. It changes the game and it changes the way we play and we know that.”

Giangkon ni Warriors coach Steve Kerr nga nadismaya gyud kaayo sila sa ilang napakita sa maong panagsangka.

“They were desperate tonight and played like it, and we weren’t and it showed,” ingon ni Kerr.

Motapon karong Dominggo (Lunes sa Pilipinas) ang series ngadto sa Oakland, California, ang balwarte sa Warriors alang sa Game 3 ug ingon man sa Game 4 sa dili pa kini mobalik ngadto sa Houston alang sa Game 5. (JBM)


VIEW COMMENTS