SECTIONS
Sunday , May 20, 2018
SUPERBALITA CEBU

German national ikiha og child trafficking

GIKATAKDANG mag-atubang og kasong qualified trafficking ug child abuse ang usa ka 67 anyos nga German national ug kauban niining Pinoy human magdala og duha ka menor sud sa giabangang lawak niini sa usa ka apartelle sa may Sitio Ka-ensong, Barangay Basak, dakbayan sa Lapu-Lapu niadtong Miyerkules sa hapon.

Gikatahong gikan nag-beach ang mga suspek uban sa 12 anyos ug 16 anyos nga mga batang lalake sa wa pa kini misulod sa lawak sa langyaw pasado alas 4:00 sa hapon.

Matod ni CInsp. Juan Capacio, hepe sa Marigondon Police Station 4 sa Lapu-Lapu City Police Office (LLCPO) nga nadawat nila ang report kalabot sa kadudahang lihok sa suspek human adunay concerned citizen nga nitaho saawotoridad.

Ang mga suspek giila nga sila si Ulrich Market I, 67, minyo, kasamtangang nagpuyo sa Jo-Cris Apartelle sa dapit.

Ang giilang higala ni Market nga maoy gituohang nibugaw sa mga menor sa langaw mao si Ryan Guarin, 24, taga Sudlon, Brgy. Lahug, dakbayan sa Sugbo.

Nasuta ning mantalaan gikan ni Capacio nga si Market ug Guarin nagkaila na daan sa gay-dating website ug hapit moabot sa usa ka buwan na ang ilang pagbinaluay og chat.

Ang mga minor nga gibugaw ni Guarin iyang mga silingan sa ilang barangay, matod ni Capacio.

Atol sa hiniusang operasyon sa LLCPO Station 4, City Intelligence Branch, Philippine Center on Transnational Crime Visayas Field Office (PCTC VFO), Children’s Legal Bureau (CLB), City Social Welfare and Development Office (CSWDO) ug barangay niadtong Miyerkules, naabtan pa sa mga operatiba ang duha ka menor sa lawak ni Market.

“Pag-abot nila didto, nakita nga didto pa sa sulod ang mga minor ug ang katong foreigner. Pagkataudtaud, ninggawas and then ang foreigner nitunol og kwarta sa legal age nga nikuyog sa minor,” matod ni ni Capacio sa Superbalita Cebu.

Dugang niya nga narekober sa operatiba ang P2,000 nga gihatag ni Market ngadto ni Guarin sa operasyon maong wa sila gipagawas sa apartelle.

Sa dihang gikuhaan og habig ang langyaw ning mantalaan, kini niingon nga way siyay dautang gibuhat.

Saysay niya nga igo lang sila nangaligo sa beach, nibalik sa iyang lawak, nag-shower ang mga menor, nitan-aw og TV sa wa pa kini makadesider nga mouli.

“I absolutely not guilty for me,” mubong tubag ni Market.

Sumala niya nga nahibaw siyang mga minor ang mga “higala” ni Guarin ug “nothing sexual o something like that” nga nahitabo.

Nagtuo si Market nga sayop ang interpretasyon sa concerned citizen nga nitawag sa otoridad sa iyang pagdala sa mga menor sa iyang lawak.

Sigun ni Capacio nga di kini ang unang higayon nga nilaag si Market uban ni Guarin sanglit niadto na sila sa Southern Cebu niadto.

Retiro isip computer technician si Market ug nagsige na kini og la-ag sa bisan asang suok sa nasud. Kinin a ang iyang ikaupat nga higayon ng nakabisita sa Pilipinas.

Sa laing bahin, si Capacio niingon nga kon di tungod sa kampanya sa kalabot sa human trafficking, di masikop ang langyaw.

“Atong gi-encourage ang atong mga citizen nga mo-report kung aduna silay namatikdan bitaw kay kasagaran man gud, diha pangdad-on sa mga hotel, motel, apartelle, ug apartment. Supposed to be dapat concerned pud sila sa unsay pangdad-on sa ilang mga guest. Pareha anang mga hotel, amo na na silang gi-advisan nga if ever naa moy makita nga foreigner nga magdala’g minor, report dayon sa amoa,” ni Capacio.

Narekober gikan sa mga suspek usa ka tablet, duha ka cellphone og P2,000.

Sila si Market ug Guarin gikatakdang mag-atubang ug kasong qualified trafficking nunot sa pagdala sa mga menor ug kalapasan sa Article 6 section 10 paragraph B of RA 7610 kon Child Abuse, dugang ni Capacio. (JPP)


VIEW COMMENTS