DEAR Noy Tikyo,
Maayong adlaw, Noy, nanginahanglan ko sa imong tambag.
Tawga lang ko sa ngalan nga Alyanna. Naa koy dakong suliran sa akong ginikanan ug sa akong uyab. Bahin sa akong uyab, duha na mi ka tuig nga nagkarelasyon ug gani duna mi usa ka anak. Apan ang among pagpuyo sama ra og uyab gihapon.
Apan ning bag-ohay, nakahukom na ang akong uyab nga magminyo na mi. Pero ang akong ginikanan di man mosugot. Kay naglagot kuno sila nganong karon lang ang magpakasal ang akong uyab.
Nahinumdom man god sila niadto nga nanganak ko nga wala ang akong uyab, milarga og General Santos City. Nasuko ang akong ginikanan kon nganong milarga siya ug gipasagdan ko.
Apan nasayud ko nga nangita og trabaho ang akong uyab didto aron nga ikatabang nako.
Apan ang ilang katarungan nga puwede man kunong motrabaho dinhi sa Davao City ang akong uyab, nganong kinahanglan pa nga moadto og layo?
Mao tong akong giingnan ang akong uyab, busa miuli sab siya dinhi ug dinhi siya nangita og trabaho. Karon permanent na siya sa trabaho ug kanunay nang nagsustento namo.
Mao bitaw nga makigminyo na siya kay duna na kuno siyay maayong trabaho ug makabuhi na namo.
Apan bisan niini, nagduda gihapon ang akong ginikanan kon matinud-anon ang akong uyab.
Palihug tabangi ko ning akong problema. Salamat.
Alyanna
*****
Alyanna,
Nganong magduda pa man ang imong ginikanan ngadto sa imong uyab nga pangasaw-on na gani ka niya aron nga mapiskay na ang inyong pagpuyo?
Angay pa gani unta sila magpasalamat nga sa katapusan, gitandog na sa Kahitaas-an ang kasingkasing sa imong uyab aron nga tinud-on ka niya og pangasawa.
Pasagdi na lang god tong nangagi kay di na man to makatabang kon unsa ang naa karon. Tingali, dala lang to sa panginahanglan nga kinahanglan nga molarga siya og layo kay way makita dinhi nga trabaho. Apan karon napamatud-an na di ingon niadto pagka-iresponsable siya kay bisan og milakaw siya, apan alang man kadto sa inyong kaayohan.
Wa may dautan sa inyong plano sa imong uyab, mas makaayo pa gani kini kaninyo aron nga panalanginan ang inyong pagpuyo ilabina nga duna na moy anak. Busa ipadayon ninyo ang inyong plano ug pasagdi na lang kon unsay isulti sa imong ginikanan.
Tingali sa primiro, malain sila ninyo, apan sa hinay-hinay makasabot ug makadawat ra usab sila niini kay alang man kini sa kaayohan sa inyong pagpuyo isip usa ka pamilya.
(Ipadala ang inyong suwat sa noytikyo@yahoo.com)
Noy Tikyo