UNANG 10 ka mga lalake ang nasikop sa kapulisan sa dakbayan sa Mandaue ug Lapu-Lapu nga nakuhaan og ilegal nga drugas, nisunod ang laing duha sa laing dapit niadtong Huwebes sa gabii.
Walo sa unang 10, nasikop atol sa checkpoint sa Mandaue ug duha niini nasikop sa dakbayan sa Mandaue nag-edad og 17 anyos.
Ang unang menor nga dinakpan nailhan nga si Alex (tinuod ngan gipugngan), taga Barangay Pajo, dakbayan sa Lapu-Lapu. Nasikop si Siaton sa alas 7:45 sa gabii.
Tag-usa ka pakete sa gituohang shabu ang nakuha gikan sa walo nga nasikop sa checkpoint sa Zuelig St., Barangay Centro, dakbayan sa Lapu-Lapu nga pinagulohan ni PCInsp. Aldrin Villacampa.
Mga 15 minutos sa wa pa nasikop si Siaton, nasikop sa kapulisan si Edward Ynot, 28, taga Zone Tambis, Barangay Umapa, dakbayan sa Mandaue human nakuhaan og usa ka pakete sa shabu.
Sunod nga nadakpan sa kapulisan sa Station 1 sa Mandaue City Police Office (MCPO) mga alas 8 sa gabie mao sila si Ariel Patigdas, 33, taga Sitio Sangi, Brgy. Pajo, Lapu-Lapu; Jimy Posadora, 51, taga Zone 1 Barangay Buaya, Lapu-Lapu City; ang duha ka mga taga Sitio Mahayahay, Barangay Apas, dakbayan sa Sugbo nga sila si Stanly Perolino, 36, ug Roldie Romero, 22.
Pasado alas 11 sa M. Logarta St., Barangay Subangdaku, nakuhaan sab ug usa ka pakete sa gituohang shabu ug 21 ka mga putos ang mga suspek nga sila si Jerome (tinuod ngan gipugngan), 17, ug Antonio Langga, 20, parehong taga Barangay Tipolo, Mandaue apan lumad nga taga dakbayan sa San Carlos, Negros Oriental.
Samtang didto sa dakbayan sa Lapu-Lapu, nasikop ang duha ka mga lalake atol sa buy-bust didto sa Sitio Kauswagan, Barangay Bankal.
Ang mga suspek giilan nga sila si Allan Igot, 46, ug Larry Lauronilla, 37, nalakip sa watchlist ug surrenderer sa Lapu-Lapu City Police Office.
Moabot sa 20 ka pakete sa gituohang shabu ang nakuha gikan sa duha nga moabot sa 1.2 gramos ang timbang ug moabot sa P14,160 nga DDB value.
Gawas sa drugas, usa ka kalibre .45 nga armas nga may magazine ug 5 ka bala, P500 nga buy-bust money, ug P1000 nga kinitaan.
Ang mga suspek kinsa kasamtangang gibalhug sa prisuhan gikatakdang mag-atubang og kasong kasalapasan sa paghupot og pagbaligya og iligal nga drugas.
Samtang sa Talamban, dakbayan sa Sugbo, duha ka Street Level Target ang nasikop niadtong Huwebes sa gabie atol sa buy-bust operation nga gipahigayon sa Sitio Borbajo.
Giila ang mga suspeknga sila si Carlo Acug Lagura, 34, waiter, residente sa Sitio Borbajo ug si Dixon Patindol Armecin, 25, adunay kapuyo, walay trabaho ug nagpuyo sa Sitio Lower, Barangay Talamban, dakbayan sa Subo.
Nagpahigayon og buy-bust operation ang kapulisan sa Talamban human nakig-alayon sa Philippine Drug Enforcement Agency (PDEA-7) ug si PO2 Willgen Llaguno maoy nagpaila isip usa ka poseur buyer ug nidunol sa P200 isip ilis sa drugas ug didto daling gi posasan si Armecin.
Nasakmit gikan nila ni Lagura ug Armecin ang usa ka medium size nga pakete sa shabu ug tulo ug tunga ka gagmayng pakete sa shabu ug kwarta nga nagkantidad sa P400 nga gituohang halin sa pagpamaligya og shabu.
Ang shabu nga nakuha adunay gibug-aton sa 3 grams ug adunay Dangerous Drugs Board (DDB) value nga 35,400.
Sila si Amercin ug Lagura kasamtangang natanggong sa Talamban Police Station sa dakbayan sa Sugbo ug pasakaan sa kasong paglapas sa Section 5 ug Section 11, Article 2 sa Republic Act 9165 o Comprehensive Dangerous Drugs Act. (JPP, Carla Jane Calotes - CNU Comm Intern)