GISUSI karon sa kapulisan kung kinsa ang mga suspek sa pagpatay sa tulo ka mga tawo kinsa gipusil sa managlahing lugar sa Davao City ug Davao del Norte.
Unang pagpamusil gikamatay sa care taker sa plantasyon sa sili sa Barangay Baracatan, Toril District, dakbayan sa Davao niadtong Huwebes, Mayo 17.
Ang biktima si Alfredo Bayawan, 50, minyo, stay-in worker, lumad nga taga Calinan ning siyudad.
Base sa inisyal nga imbestigasyon sa kapulisan, ang biktima napalgan nga wa nay kinabuhi sa iyang higala alas 6:30 sa buntag mao nga gitaho sa ilang barangay kapitan.
Sa pagsusi sa pulis, nasuta nga nabulit sa dugo ang biktima kinsa naghigda sa iyang duyan.
Nakuha sa lugar ang lima ka basiyo sa .45 kalibre nga pistola nga maoy gigamit sa mamumuno.
Mga silingan nagbutyag nga alas 10:45 sa gabii niadtong Miyerkules nakadungog sila og buto sa armas sa maong lugar.
Ang patay nga lawas sa biktima tua na sa Angel Funeral Homes.
Ika-duhang pagpamusil nahitabo alas 2:22 sa kaadlawon niadtong Huwebes sa 7 Eleven atubangan sa Davao Regional Hospital sa Barangay Apokon, Tagum City.
Ang biktima giilang si Jordan Brgadao, minyo, security guard sa Black Fighter Security Agency ug residente sa Mawab, Compostela Valley Province.
Ang biktima nag-duty niadtong orasa apan kalit miabot ang nag-inusara nga mamumuno dayon gipusil siya sa makadaghan nga higayon.
Ang mamumuno daling misibat ngadto sa wa matino nga lugar samtang ang biktima gidala sa duol nga ospital apan gideklara nga patay na siya.
Nakuha sa lugar ang unom ka basiyo sa .45 kalibre nga pistola.
Ika-tulong pagpamusil nahitabo alas 10:15 sa buntag sa Purok 3, Barangay Little Panay, Panabo City.
Ang biktima giilang si Ariel Maquiran, 33, minyo, residente sa Purok 4, Barangay Maduao sa maong siyudad.
Nasayran nga nagmaneho ang biktima sa iyang motorsiklo apan paghiabot niya sa lugar kalit siyang gipusil sa wa mailhing tawo sa makadaghan nga higayon nga miresulta sa iyang kamatayon.
Nakuha sa kapulisan ang 8 ka basiyo sa bala sa .45 kalibre nga pistola samtang ang biktima gidala sa Rivera Funeral Homes sa Panabo City.
Naningkamot karon ang otoridad nga masayran kung unsa ang motibo ug kinsa ang mga mamumuno aron masikop ug mapasakaan og kaso sa korte. (Alger P. Dura)