TALANDUGON ang kahimtang sa usa ka ulitawo human nga gitabangan pagdunggab mga ala 1:15 sa kaadlawon Biyernes, Mayo 18, sa V-Castro street, Barangay Carmen, dakbayan sa Cagayan de Oro.
Upat ka mga samad ang naangkon ni Reymund Eslabra, 26, ulitawo ug residente sa Zone-4, Tambo, Barangay Carmen.
Sa nahipos nga impormasiyon gikan sa kapulisan sa Police Station 4 (PS4) sa Carmen, daling miresponde ang mga otoridad human sa nadawatang taho kalabot na sa insidente. Daling gidala sa nailang si John Lloyd ang biktima sa Northern Mindanao Medical Center (NMMC) human nga naligo na kini sa kaugalingong dugo.
Samtang sa saysay sa duha ka mga higala sa biktima nga nag-inom kini sila sa maong dapit apan kalit lang gitabangan sa pagdunggab sa duha ka mga suspetsado nga nailang sila si alyas Lapu ug Denmark si Eslabra sa wala’y igong rason.
Gidugang pa nga lakip usab si John Lloyd ang ilang nakitang usa sa mga migukod sa biktima hinungdan na usab nga gihuptan una kini sa kapulisan alang sa dugang imbestigasiyon.
Ang biktima ang padayon pa nga gi-obserbahan sa mga mananambal sulod sa NMMC kinsa anaa sa talandugon nga kahimtang samtang anaa sa kustodiya sa kapulisan ang lalaking naila nga si John Lloyd.
Padayon pa ang imbestigasiyon sa kapolisan aron masuta kung unsa ang tinuod nga hinungdan sa maong natigayong kagubot nga miresulta sa pagpangdunggab.