KANANG 49 ka mga kapitan nga midaog nga kaalyado sa Bando Osmena Pundok Kauswagan (BOPK) posibleng mapun-an pa unya na. Hinay-hinay nang namalhin ang midaog nga mga kapitan nga kaalyado sa Barug Team Rama o Barug PDP Laban ngadto sa kampo sa BOPK. Nag-ober de bakud na ang uban. Niadtong miaging Biyernes ang tanang sakop sa konsiho sa barangay Guba gipangulohan sa ilang kapitan ang nanumpa na ngadto sa ‘kanhi laos nga pulitiko’.
Sama sa akong gika-ingon sa una natong mga lindog nga dili na maglisod sa pagdaog unya sa kandidato sa BOPK sa eleksiyon sa Association of Barangay Council (ABC) nga molingkod isip ex-officio member sa konsiho. Si Kasambagan barangay captain elect Franklin Ong ang posibleng i-endorso sa grupo. Si Ong na-ilang kaalyado og campaign fund contributor sa BOPK. Iya tanang gi-corner ang mga transaksiyon sa City Hall labi pa ang paghakot og basura.
Kon mamayoriya na unya ang BOPK sa konsiho, dili na maglisud ang administrasyon sa pagpasar og mga balaodnon nga mosuporta sa mga programa ug proyekto sa ehikutibo. Bisan kadtong mga balaudnon ug mga kasabutan nga gisalindot sa taga oposisyon kaniadto gumikan sa pulitika, ma-file na kadto ug posibleng ma-aprobahan na.
Sa habig usab sa mga kapitan, gikinahanglan gyud nga moabin sila sa administrasyon aron dali ra usab kanila ang pagpangayo og mga mehuras ug proyekto alang sa ilang barangay ug mga konstituwente. Maglisud man god sila kon anaa sila sa oposisyon. Unsa may ihatag sa taga oposisyon nga ang taga administrasyon man ang naghawid sa puntil.
Naa bitaw nang mga barangay kansang mga barangay kapitan kaalyado sa taga oposisyon, lisud man kaayo ang paglambo. Labi pay giatbangan kini sa gitukod sa mayor nga Barangay Mayor’s Office. Ultimo pagpangayo og suga, dili ihatag. Magpu-asa ang usa ka barangay kon taga oposisyon ang kapitan. Mao nay gi-ingon sa eninglis nga ‘political reality’.
Maayo gyud tong naa sa administrasyon kay makapangayo og bisan unsa sama sa lungon, suga, tapak sa mga libaong sa kadalanan ug uban pa. Tan-awa unya di ba daghan ang manabok.
(bobbygnalzaro@gmail.com)