PANGANDOY ni Lorjie Mae “Gmay” Asejo nga makumpleto ang ilang pamilya sa higayon saulogon niya ang ika-18 nga sumad sa iyang adlaw nga natawhan niadtong Abril 23, 2018.
Apan wa kini mahitabo kay wa makauli ang iyang amahan nga si Robert, nga tua manarbaho sa Jeddah, Saudi Arabia, isip usa ka electrician.
“Dili ko hilig og hikay, bongga nga party. Gusto lang nako kumpleto mi, among pamilya, unya manimba,” matod sa debutant.
Layo man sa iyang pamilya, naningkamot si Robert nga mabati sa iyang dalaga nga anak ang iyang presensiya sa espesyal nga adlaw niini.
Tulo ka oras sa wala pa gihimo ang salo-salo sa paniudto sa birthday party ni Gmay, nag-videocall ang 40-anyos nga amahan ug ni-greet kini sa iyang birthday uban sa paghatag og mensahe.
“Even though dili mi kumpleto, dili bongga ang akoa pareho sa ubang debut party, pero happy kaayo ko ato,” sumala ni Gmay sa pakighinabi sa Superbalita Cebu.
Sumala ni Gmay nga ang iyang inahan nga si Gladys Mae, 39, mas ganahan nga hikayan siya sa iyang debut.
Apil sa nitambong sa iyang debut party ang iyang kanhi mga klasmeyt sa Grades 10 ug 11, kabanay sa iyang amahan ug inahan ug iyang mga higala.
Usa sa iyang birthday wishes nga motapos siya sa Grade 12 isip honor student.
Sa party, ang maguwang sa iyang inahan nga si Elvira Palicte maoy niregalo og birthday cake, bouquet ug sinina nga iyang gisul-ob sa okasyon.
Ang iyang suod nga higala nga si Jafith Saldivar ang niregalo niya og usa ka garapon sa Stick-O ug explosion box nga napuno sa mga hulagway nila.
Sa maong okasyon, nabati ni Gmay kon unsa siya kamahal sa iyang mga ginikanan ug igsuon nga si Shane Marie.
Pasalig niya sa iyang mga ginikanan nga bisan kon 18 anyos na siya, mokonsulta gihapon siya sa mga desisyon nga himuon ug magpabilin nga usa ka buotan ug mapinanggaon nga anak.
“Don’t worry (sa akong mama ug papa) dili ko mobuhat dayon og desisyon, mokonsulta ko nila daan, bisan og 18 nako, need gihapon nako ilang help, dili ko mag-hesitate manawag nila,” dugang ni Gmay.