GIPAHIBALO ni Mandaue City Mayor Luigi Quisumbing nga mopahigayon og Gay Pride Parade ang dakbayan sa sunod buwan.
Kini mao unya ang pinaka-unang martsa sa mga miyembro sa Lesbians, Gays, Bisexuals, and Transgenders (LGBT) community sa Mandaue, ug maoy giisip nga pinaka-una sa Cebu.
“By all account it’s going to be a very, very important and meaningful event,” matod ni Quisumbing sa dihang nahinabi sa Superbalita Cebu kagahapon.
Nauna na nga gi-anunsyo sa mayor ang maong kalihukan atol mismo sa iyang opening speech sa gipahigayon nga Mandaue Gay Pageant niadtong Mayo 9 didto sa City Cultural and Sports Complex.
Ang maong kalihukan gikatakdang mahitabo sa katapusang semana sa Hunyo.
Matod ni Quisumbing nga nagdesider pa sila ko himuon sa petsa 25 o 26 sa Hunyo ang parada.
Gitataw sa mayor nga duha ka adlaw nga kalihukan unya ang mahitabo niini apan ang padayon pang gilihok sa city hall ang mga detalye sa maong Pride Parade ilabi na ang rota niini.
Gitumong ang Gay Pride Parade sa buwan sa Hunyo sanglit kini man ang giisip nga Pride Month sa tibuok kalibutan.
“They’re still fixing the route, but the culminating activity will be here in the plaza,” sumala pa ni Quisumbing.
Si Gender and Development (GAD) focal person Apple Yu sa City Social Welfare and Services Office (CSWS) mao unya ang modala sa maong kalihukan, dugang ni Quisumbing.
Ang mayor niingon nga siya mismo mo-matsa atol sa kalihukan.
Gikatakdang momartsa sab unya ang kinakusgan nga LGBT rights advocate sa city hall nga si city treasurer Atty. Regal Oliva.
Si Quisumbing niingon nga kuyog sab unya nila nga momartsa ni Oliva ang mga respresentante ug mga miyembro sa LGBT group sa 23 ka mga barangay sa Mandaue.
“One of our strongest LGBT rights advocate si Atty. Regal Oliva, is also going to be part of the organization together with about 23 BLGT barangay representatives,” matod ni Quisumbing.
Dugang niya nga nanghinaot si Oliva nga sa di pa mahitabo ang Pride Parade, aduna nay LGBT nga grupo ang tanang mga barangay sa dakbayan aron kini makasalmot.
Sigun pa sa mayor nga may mga mosalmot sab unya nga mga representante sa silingang dakbayan sa Lapu-Lapu, dakbayan sa Sugbo ug lungsod sa Consolacion.
“The city will be utilizing a portion of its budget and of course, the employees of city hall will also be helping to organize it,” ni Quisumbing.
Kahinumduman nga ang LGBT Day sa Mandaue natumong og Nobyembre tungod kay sa maong buwan napasa sa konseho ang LGBT Code sa dakbayan nga nagprotiher sa tawhanong katungod sa mga miyembro sa LGBT.
Padayag niya nga gawas sa mga aktibidad sa Hunyo alang sa Pride Month, aduna say localized nga aktibidad karong Nobiyembre. (JPP)