UPAT ka mga panimalay ang nakan-an sa kayo atol sa sunog nga nahitabo sa dan Magsaysay, Barangay Pasil dakbayan sa Sugbo kagahapon sa buntag.
Ang kasaba sa wang-wang sa bombero maoy nakapukaw sa mga nangatulog pa nga residente sa maong dapit human nitumaw ang sunog kagahapon.
Sa natala sa Cebu City Fire Department nadawat nila ang alarma alas 7:43 sa buntag diin nakontrolar kini alas 7:57AM, na fire-out ra hinuon kini alas 8:27AM.
Nasayran nga gikan sa panimalay ni Jennifer Mosqueda ang maong sunog diin traceable electrical misuse ang rason sa maong insidente.
Apektado ang walo ka pamilya ug 47 ka indibidwal sa maong sunog diin gibana-banang anaa sa P30,000 ang danyos niini. (HBL)