1 gipusil-patay; laing 2 samdan
PATAY ang usa ka lalake human gipusil samtang natulog sa iyang barungbarong sa Seaside South Road Properties (SRP), Barangay San Roque, Sugbo kagahapon, alas 12:45 sa kaadlawon.
Gipusil-patay ang biktima nga giilang si Randy, naa sa pangidarong 25 hangtod sa 30 anyos, libodsuroy sa wala pa mailhing mamumuno.
Sa gipahigayon nga inisyal nga imbestigasyon sa kapulisan base sa saysay sa impormante nga si Angelica Jamein, libodsuroy sa maong dapit ug lumad nga taga Carmen, Sugbo nga nakadungog siya og duha ka sagunson nga buto sa pusil.
Nakaangkon ang biktima og duha ka samad pinusilan, usa sa ulo ug usa sa abaga.
Ang lawas sa biktima gidala sa St. Francis Funeral Homes sa N. Bacalso Avenue para sa autopsy.
Sa laing bahin, daling gidala sa Perpetual Succor Hospital ang usa ka lalake human makaangkon og samad pinusilan didto sa Ponce 2, Barangay Carreta, siyudad sa Sugbo niadtong Mayo 18.
Gipusil sa suspek nga si Michael Rondina, adunay kapuyo, lumolupyo sa maong lugar ang biktima nga si Narciso Medina, 28, adunay kapuyo, molupyo sa San Roque, Barangay Lorega, siyudad sa Sugbo.
Naigo si Medina sa tuong bahin sa iyahang bukton ug nigawas ang bala sa walang bahin sa iyang bat-ang hinungdan nga gidali pagdala sa tambalanan.
Sa inisyal nga imbestigasyon sa kapulisan base sa saysay sa biktima naglingkod siya sa iyahang motor gawas sa balay sa iyang lola sa dihang gikalitan siyag pusil ni Rondina. Miangkon si Medina nga kaila sila ni Rondina ug nasurprisa siya sa pagpamusil niini.
Nahipos sa kapulisan ang usa ka kabhang sa calibre 45 sa crime scene.
Puro personal nga pagdumot ang hinungdan sa duha ka pagpamusil.
Sa pagkakaron, padayon gihapon ang kapulisan sa ilang follow-up nga imbestigasyon sa mga pagpamusil.
Samtang, gipusil sa wala mailhing tawo ang usa ka lalaki sa Sitio Magay, Barangay Tangke, dakbayan sa Talisay niadtong Biyernes.
Ang suspek giila nga si Ireneo Corazo, 41 anyos taga Upper San Roque sa maong barangay.
Nisaysay si Corazo nga niadtong alas tres sa kadlawn sa parehong adlaw, samtang siya naglakaw, kalit lang nga nibutho ang wa mailhing suspetsado, mipusil niya sa likod ug nisibat dihadiha dayon.
Midangop si Corazo sa Tangke Barangay Hall ug daling gidala sa tambalanan.
Nakaangkon ang biktima og samad pinusilan sa toong bahin sa iyang sampot ug natapsingan usab ang iyang liog.
Padayon pa ang imbestigasyon sa kapolisan sa pag-ila sa suspek ug ang motibo sa maong insidente. (Loydin Frill Chavez, CNU Comm. Intern ug Treshea Mae Phrea Y. De Pio- STC Intern)