NGANONG nang-harass man mo sa bag-ong napili nga mga Sangguniang Kabataan (SK) chairpersons?
Mao ni ang kwestyon ni Cebu City Mayor Tomas Osmeña nga giitsa ngadto sa oposisyon sa iyang Facebook nga gipetsahan og Mayo 17.
“That’s tantamount to corrupting minors. Are you so desperate to cling on to the last vote in the (City) Council? Is there no end to your despair?” siya nidugang.
Way duha ka mga semana gikan karon, ang mga chairperson sa SK sa tanang 80 ka mga barangay mopili sa ilang presidente ug board members.
Ang mga presidente sa Association of Barangay Councils (ABC) ug SK Federation molingkod isip ex-officio members sa City Council.
Sa pagkakaron, ang Bando Osmeña Pundok Kauswagan (BOPK) ug ang opposition dunay tag walo ka mga sakop sa konseho.
Si Vice Mayor Edgardo Labella, presiding officer, sakop usab sa opposition.
Dunay mga espikulasyon nga ningkatap sa online nga ang oposisyon nag-organisar og mga tigom tali sa mga pangu nga nangapili sa SK aron pagdani kanila.
“Go ahead. Talk to them. You have nothing to offer them anyway. I, on the other hand, am willing to explain every policy, decision, and project I want them to participate in. And no matter how much you promise or talk, I am still the mayor,” nagkanayon si Osmeña.
“I will give all the SKs (allied or not) the opportunity to HELP Cebu. You are trying to use them to HURT Cebu. They will choose wisely what they want to do,” siya nidugang.
Usa ka text message nga gi-address ngadto sa SK chairpersons nakadani sa atensyon sa mayor.
Ang texter, kinsa nangangkon personnel sa Cebu City Youth Office (CCYO), nidapit sa SK heads sa usa ka panihapon sa usa ka hotel aron tukion ang guidelines sa Department of the Interior and Local Government (DILG).
“We just received the copy from DILG and we will be distributing them tomorrow (May 19) night,” matod sa tipik sa mensahe.
Si Jess Anthony dela Cruz, pangu sa CCYO, nanghimakak sa imbetasyon sa kalihukan.
Siya nidugang nga ang SK chairs mahimong mokuha sa DILG memorandums and conduct of orientation sa Mayo 21.
Sila si opposition Councilors Joel Garganera ug Raymond Alvin Garcia nanghimakak sa mga alegasyon.
Alang kang Garganera, ang mayor maoy nisuway sa pag-impluwensya sa pulitikanhong panan-aw sa mga lider sa kabatan-unan.
“Kung unsa iyang buhaton, kami ang pasanginglan. There’s an election coming for them, so we might as well leave them be,” nagkanayon si Garganera.
Ang BOPK nangangkon nga mayoriya sa mga mingdaug nga SK chairmen ilang mga kandidato hinungdan nga sila masaligon nga ang duha ka mga lingkuranan sa ex-officio members nga naglakip sa ABC mailaha human sa mao nga mga piniliay. (RTF sa Sunstar Cebu)