Miral mihimo og kasaysayan sa Ermita

WA magpatarog sa mga pagsuway si Barangay Captain-elect Mark Miral sa Ermita taliwa sa mga pagsuway nga nidangat kaniya ug sa barangay.

Nagpadayon ang kampanya sa Barangay ug Sangguniang Kabataan elections dihang niulbo ang sunog sa sityo Kawit diin nalakip sa pagka-ugdaw ang iyang balay.

Dihang pagsilaob sa kayo, nagtuo si Miral nga di moabot sa sityo Poblacion ang kayo mao nga nitabang siya sa mga tawo sa Kawit aron mapahimutang ug magiyahan para di maratol ang mga molupyo sanglit sayo sa buntag ang sunog.

Gumikan sa kaokupado sa iyang panahon, nakurat nalang siya nga nitabok ang kayo paingon sa iyang pinuy-anan ug kasikbit nga mga balay.

“ Nagkadako man gyud ang kayo. Wa na tay armas (tubig kay nahutdan ang ilang firetruck) ug nilabang gyud ang kayo didto padong sa amoa. Hangtod nga wala gyud koy nakuha” Saysay ni Miral sa sunog niadtong Mayo 7.

Gumikan niadto, wala panumbalinga sa batan-ong Miral kinsa nihulip pagkakapitan dihang namatay si anhing kapitan Felicisimo “Imok” Rupinta nga wala na siyay pinuy-anan mapahimutang lang ang kapin 700 ka mga pamilya sa sports complex ug sa eskwelahan.

Dihay mga higayon nga nihunong una sila og pulongpulong aron matabangan ang mga tawo ug gitugyan nalang sa katawhan kon si kinsa ang ilang pilion pagka-kapitan sa barangay.

Apan taliwa sa ilang ka-busy uban sa iyang pito ka mga konsehal nga silang Domingo Ando Jr., Maria Pino, Antonieto Flores, Ryan Rosas (nasunogan sab), Efe Rupinta ug kaubanan, doble ang iyang kayod sanglit gawas nga moatiman pa siya sa kapin 3,000 ka mga tawo, sanglit lig-on usab ang iyang kontra nga si Amor Peliña nga maoy BMO sa Ermita.

“Wa sad masud sa akong hunahuna ang pamulitika. Dili ko mo mind about politics, akoa lang serbisyo ug unsay tabang moabot akoy mopahimutang para sigurado nga moabot sa mga apektado,” dugang ni Miral.

“Wa ko naghunahuna sa eleksyon. Bahala na unsay resulta importante unsay atong matabang ug wala na lang gani ko maghunahuna sa akong kaugalingon bisan apil ko sa nasunogan,” dugang ni Miral.

Apan wa magpasagad ang libuan ka mga tawo sa Ermita sanglit atol sa piniliay, si Miral nakakuha og 3,476 botos batok sa 2,138 ni Peliña ug nidaog usab iyang pito ka mga konsehal ug SK chairman uban sa mga konsehal.

Iyang gihulagway nga ang nahitabo sa Ermita sa eleksyon usa ka kasaysayan sanglit wala pa mahitabo kaniadto nga nag 16-0 sila.

Iya usab gipasalamatan ang tanang mga tawo sa iyang barangay nga nisuporta sa ilang grupo bisan kon dili nila alyado ang administrasyon sa City Hall.

Sa pagkakaron, ang pamilya ni Miral nagbuwagbuwag sanglit ang iyang mga anak tua didto sa Talisay samtang siya adto matulog sa barangay hall samtang wala pa sila makabalik sa lugar nga nasunogan sanglit giandam pa ang lugar para di na masubli ang kalamidad.