GIDOBLE ni Presidente Rodrigo Duterte ang premyo alang sa Philippine National Games 2018 atol sa iyang pag-anunsiyo niini sa iyang speech kagabii sa pagbukas sa maong sporting event.
Si Duterte nianunsiyo nga doblehon niya ang P5 milyones nga premyo sa overall champion diin mamahimo na kini nga P10 milyones.
Samtang ang second runner up doblehon usab niya ang P4 milyones nga premyo niini diin mamahimo na kini nga P8 milyones.
Ang 3rd runner up makadawat na og P6 milyones gikan sa gitagana ra unta sa Philippine Sports Commission nga P3 milyones.
Samtang ang 4th runner up makadawat og P4 milyones ug 5th makadawat og P2 milyones.
Si Duterte kinsa mao ang dinapit sa maong kalihokan, late nga naabot diin unta alas 5:00 ang gikatakda nga pag-abot, apan naabot siya pasado alas 7:00 na sa gabii.
Gikan sa lungsod sa Alegria ang presidente alang sa commencement ceremony sa oil exploration sa maong dapit.
Atol sa iyang speech, niawhag siya sa PSC nga ipadayon ug pahugtan pa ang kolaborasyon sa maong ahensiya sa tagsa-tagsa ka local government unit sa matag sa paugnat sa kusog.
Susama og Sinulog Festival ang paghangop sa Sugbo sa mga atleta sa PNG 2018 atol sa opening ceremonies niini sa Cebu City Sports Complex.
Nagsugod ang parada sa mga atleta ala 1:00 sa hapon kagahapon diin nanukad kini diha sa Osmeña Blvd., paingon sa CCSC.
Si Cebu City Mayor Tomas Osmeña mao ang nihatag sa welcome remarks atol sa unang parte sa programa diin gisundan kini sa oath of athletes, coaches ug officiating officials.
Gitunolan usab og plaque of appreciation sila si Osmeña ug Cebu Governor Hilario Davide III gikan nila ni Philippine Sports Commission Chairman William Butch Ramirez ug PSC Commissioner Ramon Fernandez isip pasalamat nga ng dakbayan ug lalawigan sa Sugbo ang host sa PNG 2018.
Karong adlawa na magsugod ang mga duwa sa mga atleta diin ang mga mananaog niini mao ang makigtigi sa Asian Games. (HBL)