USA ka gidudahang hacker ang nadakpan sa Anti-Cyber Crime (ACG) 7 sa usa ka entrapment operation human niya giingong kilkilan unta ang dalaga pinaagi sa paghulga nga iyang i-upload ang hubo niyang mga hulagway.
Si Charles Diaz, 20, taga Barangay Tisa, dakbayan sa Sugbo, mag-atubang og mga kasong kalapasan sa Article 293 sa Revised Penal Code nga may kalambigitan sa extortion nga nalatid sa Section 6 sa Cybercrime law.
“The 18-year-old victim said that her nude photos came from her boyfriend’s Facebook account which was hacked last May 16. So we advised her to keep on communicating with the suspect and when he agreed to meet up in a money remittance center in Barangay Kalubihan, we effected the arrest after he took the marked money from the victim,” matod ni Chief Insp. Leo Dofiles, chief sa ACG-7.
Si Diaz nadakpan mga alas 2:30 sa hapon niadtong Biyernes.
Si Diaz giingong hacker nga gikataho nga naggamit og key logger nga iyang gitaud sa usa sa mga unit sa computer sa usa ka internet cafe sa Tisa, nagkanayon si Dofiles.
Ang key logger usa ka gamit nga software o hardware nga ibutang sa computer aron makuha kon unsa ang gipangtuslok sa keyboard sa naggamit.
Sagad gigamit kini sa pagkawat og mga password ug sekretong mga impormasyon.
Matod sa ACG -7 nga ilang pahibaw-on ang tag-iya sa internet cafe aron makahibawo sa gibuhat niini.
Ang uyab sa 18 anyos nga babaye hayan mokiha usab kang Diaz.
Si Diaz gikataho nga nangayo og P10,000 gikan sa biktima alang sa iyang hubo nga mga hulagway, dugang ni Dofiles.
Sa pagpadayon sa negusasyon, si Diaz niuyon nga di niya i-post ang hubo nga mga hulagway bugti sa P5,000 ug sex.
Apan, nausab ang huna-huna ni Diaz kay uban kaniya ang iyang kapuyo niadtong higayuna, dugang ni Dofiles. (JOB sa Sunstar Cebu)