ART E. CANARES
Minglanilla, Cebu
PAGPILI kinsay imong pustahan, si FPJ o si Max Maute?” gihagad ni Atty. Mar Martini si Atty. Roy Saluber nga didto sa klinika ni Dr. Henry Calido.
Dugayng nakatubag si Roy kay nabahin ang iyang pagtagad sa abogado nga nagtawag pinaagi sa selpon ug sa doktor nga naghiling kaniya. Unya mitubag siya human mosinyas ang doktor, “Sige, adto ko pusta kang Max Maute, basta lugrohan ang akong kwarta.”
“Okey, kasado. Pila ba imong isugal?” ni Mar.
“Mosugal ko’g 2 milyon basta lugroha’g tres-dos,” sumbalik ni Roy nga gipikpik sa doktor.
“Okey, it’s a deal. Your 2 milyon against may 3 milyon,” mipahiyom si Mar kay sa ‘online betting’ way mopusta kang Max Maute.
Niining panahuna, sa tuig 2118, mao nay kalingawan sa mga tawo ang sugal sa kamatayon. Sukad mausab ang 1987 Constitution daghang lalisunon nga balaod ang gihimong legal. Sama pananglit sa ‘professional gunfight’, diin magtigi sa abilidad ang mga tawo nga mosangko sa kamatayon. Legal na sab ang panagsangka sa kriminal batok kriminal nga kondenado sa kamatayon, diin ang modaog premyoha’g kagawasan. Gitugotan na pod ang sugal alang sa tanan.
Kining sangka ni FPJ ug Max Maute adto himoa sa Octagon nga bullet proof sulod sa SRP Superdome. Pistola ang gamiton nga armas. Magharong sila nga mag-atubangay. Lima ka metros ang ilang distansiya. Ang huwes maoy mo-countdown gikan sa 5 paubos ngadto sa 0. Dayon pabuthon niya ang iyang pistola isip pagsugod sa sangka.
Agi’g pagana sa gikahinamang duwelo ni FPJ ug Max Maute, gidalit sa Alay Promotions ang ‘Tinigbasay sa Kagawasan’, diin magtakos si Bong Rivera, iladong ‘plunderer’ ug Kervin Espinoy, iladong ‘druglord.’ Apan wala pa ganinsila magharong, halos nagkadungan og katumba ang duha ka protagonista. Gi-atake sa hayblad tungod sa kakulba nga mamatay sila nga mao hinuoy ilang namatyan.
Unya nanghugyaw ang tanan dihang miabot si Max Maute nga nagsul-ob og Carcar sandals pinaresan sa malong nga gihaklap sa liog. Angayan siya tan-awon sa gitakin niyang pistola nga kalibre.22 Danao.
Kalit lang nauyog ang Superdome tungod sa kalanog sa trumpeta, tambol ug luthang. Harianon ang pag-abot ni FPJ nga nagsul-ob og barong tagalog nga asul ug nagtakin sa iyang bulawan nga pistola.
Nagkasugat ang mga tinan-awan nilang FPJ ug Max Maute. Nagtinutokay ug nagsinigaay sila sa ilang mga mata. Nahilom ang tanan dihang misugod na’g ihap ang huwes, “5-4-3-2-1.”
Nagdungan paghulbot sa ilang mga pistola ang duha ka ‘gunfighter.’ Si FPJ ang nakaunag kablit sa gatilyo sa iyang pistola, apan si Max Maute ang nakauna og pabuto sa iyaha.
Lubnganong kahilom ang mipuli sa kagahob. Inanay nga nalusno si FPJ nga misukdip ang mga mata. Wala siya makatuo ug di siya makadawat nga, sa kadaghan niya’g koleksiyon nga armas, kining bulawan niyang pistola nga gidala, wala diay kasudli nga bala.
Gihuypan ni Atty. Roy Salubre ang tsekeng tres milyunes ka pesos ug gitahan kang Atty. Mar Martini nga gipaningot bisan ‘fully air-conditioned’ ang Superdome. Mipahiyom si Roy. Gi-teksan na siya daan ni Dr. Henry Calido nga ‘malimtanon’ na kaayo si Felix Pardillo Jr.m aliyas FPJ. (KATAPUSAN)