NIABOT og 49 ka mga kandidato sa pagkakapitan ubos sa bandera sa Bando Osmeña Pundok Kauswagan (BOPK) ang nidaog sa eleksyon sa barangay niadtong Mayo 14 dinhi sa syudad sa Sugbo.
Adunay 80 ka mga barangay ang syudad sa Sugbo. Kon 49 ang mga kapitan ubos sa BOPK, 31 lang ang sa Barug Team Rama-PDP, nga kanhi maoy nakakuha sa mayoriya sa mga kapitan sa syudad.
Tulo ka adlaw human iproklamar nga mananaog, si Duljo-Fatima barangay captain-elect Ricardo Joel Ycong giatake sa kasingkasing ug namatay. Nakuhaan og usa ang mga kapitan sa BOPK.
***
Apan niadtong Mayo 18, si Guba Barangay Captain Orlan Herrera nga napili pag-usab sa miaging eleksyon, nihural atubangan ni Cebu City Mayor Tomas Osmena, ang lider sa BOPK. Nakuhaan og usa, apan napun-an og usa. Nibalik og 49 ang mga kapitan sa BOPK.
Si Herrera, unang nidagan ubos sa Barug Team Rama sa 2013, nipildi sa kandidato sa BOPK, si kanhi barangay captain Renerio Limotan. Lakip sa nilukso ngadto sa BOPK ang mga konsehal nga sila si Alexander Bontilao, Richel Eraba, Yvonne Miñoza, Teodoro Borbon, Antonio Miñoza Sr., Nelson Gabunada ug Julito Ardiente.
Mao na ba kini ang giingong sinugdan sa pagpanglukso sa mga kapitan ubos sa Barug Team Rama ngadto sa BOPK?
***
Bisan pa kon labaw ang BOPK sa gidaghanon sa mga kapitan, malaumon gihapon si Cebu City Council Raymund Garcia nga si Tisa Barangay Captain Philip Zafra, nga napili pag-usab, magpabilin isip Association of Barangay Councils (ABC) president.
Ang resulta sa eleksyon sa ABC president dakog epekto sa konseho sa syudad sa Sugbo kay kon BOPK ang modaog, hayan makuha sa BOPK ang mayoriya.
Apan matod pa ni Cebu City Councilor Joel Garganera, mahinungdanon ang oposisyon sa konseho kay mao kini ang mobarog batok niadtong makadaot sa syudad. “We need the opposition. We have a role to play in the council. We are here to do check and balance,” matod pa niya.