NAGKADUOL na ang adlaw diin manumpa ang mga napiling opisyal sa barangay ug Sangguniang Kabataan (SK).
Ang kadaghanan mga bag-ong nawong ug ang uban mga nasublian sa pagka kapitan o kagawad. Duna sa’y igo lang mohulip sa puwesto kay may kakulian ang napili sa nagkadaiyang katungdanan. Human manumpa opisyal na sila nga mangatungdanan.
Mga komitiba diha sa konseho ang han-ayon nga pangulohan sa mga konsehal kauban ang chairman sa SK. Ang pagpili ug chairman sa mga komitiba di sayon para sa ubang barangay kon basihan nato ang kasinatian sa uban.
Unya mao ni ang bantayanan ilabi na sa mga barangay nga ang nanaug di parehas ug grupo ang gihikanan. Di hinuon tanan apan kaniadto nakadungog gyud ko ug bagulbol gikan sa mga konsehal nga wa sila mahatagi og chairmanship kay di nila ka alyado ang mayoriya sa konseho. Pasabot nga di sila kauban sa grupo. Unya daghan ra ba ron ang nanaug nga di ka alyado sa kapitan ug sa kadaghanan sa mga sakop sa kobseho.
Manghinaot lang ta nga sama sa gihimo sa ubang barangay ilang bahin ang chairmanship sa mga komitiba sa way pagtagad sa bulok sa politika.
Mao gyud unta ni nindot nga unyag human sa piniliay kalimtan ang nahitabo sa kampanya ug maghiusa inay magbuwag buwag.
Ang lisod pa gyud, tungod sa politika ang mga nindot nga programa ug proyekto babagan kay ang nagduso di kauban sa grupo. Mao ni hinanggaw nga mentalidad nga di maayong pasanayon.
Unya sa akong pagtuo ang ingon ini nga kahimtang diha sa konseho masinati kung ang kapitan numero uno sab nga tigpasiugda. Pasabot si Kap way gusto nga makapakita ug maayong labok ang konsehal nga di iyaha. Pero kung mahitabo man gani ni sa inyong barangay wa magpasabot nga katapusan na sa kalibutan.
Kung si konsehal giabusohan sa mga naa sa gahum mahimo kaayo siya nga magpalaban sa Department of Interior and Local Government ug sa mga molupyo mismo sa barangay. Ang uban hinuon aron wa nay lalis magpasakop nalang sa grupo nga nagdominar sa konseho. Kana kung dawaton sab.
Mao na ang pipila sa mga atngan nga kalambuan unyag human ug panumpa sa mga nanaug sa nakalabay nga piniliay. Magkahiusa o dili ni sila ang importante nga kadtong gipangyawit ninyo sa panahon sa kampanya inyong tumanon.
ng nakapait ra ba kay nanaug kadtong siging siyagit nga sila sulogoon sa barangay nga di ra ba gyud nasugo didto sa ilang balay.
KURSO
Nakapili na ba ug kurso ang mga mopa-enroll sa kolehiyo? Simple ra ni nga pangutana apan bug-at kaayong tubagon alang niadtong wa pa gyud maka pili hangtod karon. Unsa man ang labing nindot ug labing haum nga kurso alang sa inyong mga anak? Ang makatubag ra gyud ana ang inyong mga anak ra gihapon. Kitang mga ginikanan kutob ra gyud sa pagsugyot.
Nahitabo na bitaw na sa uban nga nagbalhinbalhin og kurso di tukma sa itang kahibalo ang kurso nga gi-enroll. Mao nay lisod labi na ning panahon nga apiki kaayo ang panguwarta unya daghan pa gyud ang paeskwelahon. Ang uban lahi sab ang gigamit nga diskarte. Inay upat ngadto sa lima ka tuig nga kurso ang kuhaon, nagpa-enroll sa mga minugbo nga programa sama sa teknikal ug vocational.