WA mag palupig ang mga athleta sa Cebu City ug milangkat dayun ug 3 ka gold medal sa unang adlaw sa Philippine National Games nga gipahigayon sa nagkalainlaing dapit sa sugbo.
Ang Cebu City nakakuha sa ilang unang gold medal pinaagi ni Ronette Ayuda nga mitali sa iyang personal best 1.50-meter sa women’s high jump nga gipahigayon diha sa Cebu City Sports Center (CCSC).
Kini maoy unang higayon ni Ayuda nga nakasalmot sa PNG, diin iyang nalupig ang iyang kaubang nga si Kristie Kay Vinco(1.40m) ug Lyka Casta (1.40m) sa Baguio City.
Laing nakalabni og gold alang sa Cebu City mao si Nino Surban sa Cross-Country Olympic ug Pamela Jane Ruiz sa Junior Women’s Cross-Country mountain bike nga gipahigayun didto sa Danao City.
Base sa resulta sa 1:30 pm media tally nga gipagawas sa PNG Committee, ang Cebu City adunay unom ka silver medals ug tulo ka bronze medals alang sa ikalimang puwesto.
Ang General Santos City maoy nag-una samtang gisundan kini sa Sta. Rosa City sa ika duhang puwesto, Baguio City sa ikatulong puwesto ug Las Pinas City sa ikaupat. Clark Jude Suhot. (CNU Comm Intern)