GILANGKAT ni Cristabel Martes sa Team Baguio ang unang gold medal sa Philippine National Games (PNG) nga pormal gisugdan kagahapon diha sa Cebu City Sports Center (CCSC).
Si Martes mitapos sa women’s 10-kilometer run sa oras nga 40:11.05 aron patugbabawan ang ga kaatbang.
Nagusnod kaniya si Ruffa Surongon nga nagrepresentar sa dakbayan sa Sugbo nga may oras nga 41:16.08 alang sa silver medal finish samtang ikatulo ang laing taga Baguio City nga si Sandi Menchie Abahan nga may oras nga 44:31.03.
Ang 38 anyos nga Martes kinsa kanhi sakop sa national team ug lumad nga taga La Trinidad Benguet mipadayag og katagbaw sa iyang performance sa maong kompetisyon bisan pa man og wa niya matupngi ang iyang best record sa maong event.
Iyang giangkon nga nabalaka siya sa dihang iyang namatikdang ang pagpanggahi sa iyang bagtak apan iya lang gyud ning giagwanta hangtod sa finish line.
Sa kasamtangan si Martes usa ka full time nga inahan ni Maryam Sophie nga maoy iyang nahimong inspirasyon ning maong kompetisyon.
Modagan na ngadto sa lima na usab ka tuig nga siya nagcoach sa Baguio.
Di man tuod siya sakop karon sa national team apan mosalmot gihapon siya sa mga national opens. Karong Dominggo, si Martes mobiyahe paingon sa Korea Jeju alang sa qualifying round sa 7-Eleven run series uban sa atong garbo nga si Mary Joy Tabal ug Ruffa Surongon.
Siya gihapon ang morepresenta sa Baguio team sa 5K ug 1500K run. (RSC, JBM)