Cavaliers mibawos

ATUBANGAN sa ilang mga dumadapig, bangis nga gibawsan sa Cleveland Cavaliers ang Boston Celtics, 116-86, kagahapon sa Game 3 sa Eastern Conference finals series sa National Basketball Association (NBA).

Human nakatilaw og kastigo sa nag-unang duha ka mga duwa nga gipahigayon sa Boston, ang Cavaliers mipahimulos sa tulo ka mga adlaw nga pahuway aron tun-an ang angayan nilang buhaton ug korehian ang ilang mga kasaypanan.

Pagsugod pa lang sa Game 3, mialisngaw dayon ang kamangtas sa grupo ni LeBron James ug sayo nilang nakontrolar ang kombati hangtod nga hingpit nilang napahakan ang bintaha sa Celtics sa best-of-seven series, 1-2.

Sukwahi sa nag-unang duha ka mga duwa, ang Cavaliers nagtinabangay sa bisan asa nga departamento ning higayuna ug tanan nilang mga magduduwa gawas lang sa usa adunay natampo sa opensa.

Ang tanang starters sa Cavaliers nakamugna og dobleng numero nga puntos lakip na si Kyle Korver.

Sama sa naandan, gipangulohan ni James ang Cavaliers pinaagi sa iyang 27 puntos, nidugang og 14 puntos si Korver, ning-amot og 13 puntos matag usa sila si Kevin Love ug George Hill, nihatag og 11 puntos si J.R. Smith samtang nidugang og 10 puntos si Tristan Thompson.

Nangigo sab sa gawas ang Cavaliers diin nakapasulod sila og 17 ka three-pointers diin mitali si Korver og 4-of-4 samtang 3-of-3 si James.

“Even when things broke down, we just covered for one another,” matod ni James.

“We made them make extra passes. We made them make extra dribbles. We were flying around, and I just happened to be one of the guys on the floor that wanted to fly around as well.”

Ang Celtics, nga natagak sa 1-5 nga rekord sa road games ning maong playoffs, gipangulohan ni Jayson Tatum pinaagi sa iyang 18 puntos, nihatag og 13 puntos si Terry Rozier samtang nidugang og 10 puntos matag usa sila si Greg Monroe ug Jaylen Brown.

“They took it to us,” matod ni Celtics coach Brad Stevens. “Point blank: They just outplayed us.”

Sa kasaysayan sa NBA, 19 ra sa 300 ka teams ang nakabangon gikan sa 0-2 nga biya ug nakahimo na niini si James ug ang Cavaliers niadtong 2007 ug 2016.

Hinuon kon kasaysayan ang basihan, nakapabor gihapon og dako ang Celtics ning maong series gumikan kay aduna kini perpektong rekord nga 37-0 sa mga higayon nga nakamugna sila og 2-0 nga bintaha.

Ning kombatiha, nawagtang ang kaagresibo sa Celtics nga ilang gipagawas sa nag-unang duha ka mga duwa.

“The toughest team sets the rules,” matod ni Rozier. “They came out aggressive from the jump and never looked back. We’ve got to play aggressive from the rip. Tonight, we were all over the place, playing too fast and doing things we didn’t want to do.”

Ang three-pointers ni Hill sa 1st quarter maoy nagdugkat sa pagsutoy sa opensa sa Cavaliers nga wala mohunong hangtod na sa katapusang gutlo sa maong panag-engkwentro. (AP, ESL)