Bag-ong altar sa karaang simbahan sa Liloan gisubhan

GIBESYONAN ni Archbishop Jose Palma ang bag-ong retablo ug altar sa San Fernando Rey Parish sa dakbayan sa Liloan atol sa opening salvo sa ilang kapistahan kagahapon sa alas 7:00 sa buntag.

Ang San Fernando Rey Parish giila nga usa sa mga cultural heritage sa Sugbo ug kini karon lang na-renovate human sa 50 ka tuig.

Gisugdan ang misa og pagpaubos sa tabil nga gitabon sa altar ug didto gisurprisa ang mga parokyano sa ilang bag-ong retablo ug altar. Human niini, gipahigayon na dayon ang pagbendita ni Palma.

Si Palma malipayon ug mapasalamaton sa pagpangandam nga gibuhat sa mga kaparian sa parokya para sa ilang opening salvo sa ilang kapistahan.

Giselebrar ni Palma ang misa pinaagi sa iyang homily nga makapadasig sa mga parokyano nga magkahiusa sa kapistahan sa Pentecostes kay sigon niya “One Holy Catholic” lang ug nipadangat nga abli ang simbahan sa tanang nanginahanglan og tabang sa Ginoo.

“Ang pagtuo magbunga sa gugma. Ang gugma magbunga sa maayong buhat ug ang maayong buhat magbunga sa kalinaw,” matod ni Palma.

Human sa misa, nihatag sa mapasalamatong mensahe ang Monsenyor sa parokya nga si Msgr. Vicente L. Tupas Jr. ngadto sa tanang mga nilambigit nga nahimong posible ang ilang pag-renovate sa retablo ug altar sa parokya.

Sigon ni Tupas nga “Bahala nag nagkagidlay atong gisuot basta ihatag (nato) ang labing nindot sa Diyos.”

Ang pag-renovate sa maong altar ug retablo nikabat og P2.1 milyones ug nahuman kini sulod lang sa duha ka buwan. Ang side altars sa maong parokya wala pa mahuman apan gipaninguhaan matapos sa ilang kapistahan mao karong Mayo 30. (Kate F. Denolang STC-Intern)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph