P4-M nga shabu sakmit sa Danao

KAPIN sa P4 milyones nga balor sa shabu ang nasakmit sa kapulisan sa ilang operasyon batok sa gidiling drugas sa dakbayan sa Sugbo ug dakbayan sa Danao.

Subay sa Oplan Limpyo Danao sa Danao City Police, moabot sa 11 ka drug pushers ug 6 ka user sang nadakpan sa lima ka mga buy-bust sa dakbayan diin nagsugod kini sa alas 7:33 sa gabii niadtong Sabado ug nahuman sa ala 1:40 sa kaadlawon kagahapon.

Ang mga nangasikop nga drug pushers naila nga sila si Aiza Arcilla Dumasig, Julierez Galo Montalban, Christian Mae Cuso Formentera, Val Argadas Lofranco, Aljer Montalvo, Vanisa Pena Bohol, Nowelyn Aurita Maturan, Leezan Mae Roble Lom-oc, Rosjean Almerez Legaspi, Jonalyn Langita Asister ug Marlon Solon Padilla.

Samtang ang mga nasikop nga user naila nga sila si Ronel Denoy, Wimar Sencio Maningo, Jack Batican Rosal, Jomar Laping Miaga, Judito Hertelano Presillas, ug si Edwin Tizon Tijada.

Nasakmit gikan sa mga suspetsado ang tulo ka dagko ug 54 ka gagmayng pakete sa shabu diin aduna kini’y gibug-aton nga 78.35 gramos.

Nagkantidad ang nasakmit nga drugas og P924,530 base na usab sa Dangerous Drugs Board (DDB) value.

Samtang giila isip miyembro sa bigtime illegal drug group sa Central Visayas ang nasikop sa kapulisan niadtong Sabado sa gabii.

Ang nadakpan naila nga si Aljun Chavez, 20, kinsa kasamtangan nga nag-abang sa dan Katipunan, Barangay Tisa dakbayan sa Sugbo.

Inubanan sa kapulisan sa Police Station 10, Drug Enforcement Group, Regional Intelligence Division 7, Police Regional Drug Enforcement Unit 7, Cebu City Intelligence Branch, nasikop si Chavez diin nakuhaan kini og 300 gramos sa shabu. Nagkatidad kini og P3.5 milyones.

Nasayran nga nag-abang og lawak si Chavez sa eskina Tomlyn’s Compound sa dakbayan sa Tisa, tulo na kabuwan.

Sa Facebook Post ni Tisa Barangay Captain Phillip Zafra, taga Camputhaw daw kining suspek.

Pasakaan og kasong kalapasan sa Republic Act 9165 o Comprehensive Dangerous Drugs Act ang mga nasikop nga kasamtangan gitanggong sa awtoridad. (HBL)