MIHANGYO si Provincial Board Member (PB) Sun Shimura og dugang presensiya sa kapulisan sa kadalanan sa lungsod sa Daanbantayan human sa nahitabo sa ilang pamilya niadtong Mayo 13.
Ang bokal mopadayag sa iyang gibati sa hitabo pinaagi sa iyang privilege speech karong hapon atol sa regular session sa Sangguniang Panlalawigan sa Sugbo.
Siya representante sa ikaupat nga distrito sa Sugbo sa PB diin sakop ang Daanbantayan.
Si Shimura, stepson ni Daanbantayan Mayor Vicente Loot, nipadayag og kabalaka sa kaluwas karong panahona ilabi na nga nahitabo ang pagpangrakrak ngadto nila sa dihang gipatuman pa sa kapulisan ang Commission on Elections (Comelec) gun ban alang sa barangay ug Sangguniang Kabataan elections niadtong Mayo 14.
Ang bokal unang niawhag sa iyang ama-ama nga mayor nga makig-estorya kang Presidente Rodrigo Duterte.
Apan, ang mayor niangkon nga naglisod siya bisan og kadaghan na siya naninguha nga makahinabi ang presidente, kay way kahigayonan alang niini.
“I have been doing that for the last two years, but way access,” pag-angkon ni Loot dihang nahinabi sa Superbalita Cebu kagahapon.
Si Shimura unang nagduda nga ang mga niatake nila susama sa nibanhig sa sakyanan sa magpapatigayon nga si Wellington Lim niadtong Marso. (SCG)