Loot miawhag sa awtoridad sa pagsiksik sa iyang balay

CEBU. Daanbantayan, Cebu Mayor Vicente Loot (SunStar file photo)
CEBU. Daanbantayan, Cebu Mayor Vicente Loot (SunStar file photo)

GIAGDA ni Daanbantayan Mayor Vicente Loot ang mga awtoridad nga mobisita sa ilang balay ug dad-on ang tanang kahimanan aron masiksik kon duna bay makita nga mga timailhan sa gidili nga drugas.

Matod niya, ang Philippine National Police, National Bureau of Investigation ug Philippine Drug Enforcement Agency (PDEA) adunay bag-o ug moderno nga kahimanan nga maka-detect og inagian sa gidili nga drugas kon ugaling duna man siyay gitagoan sud sa ilang panimalay.

Ang mayor namahayag niini human gilakbitan na usab siya ni Presidente Rodrigo Duterte atol sa private dinner sa mga mayor ug ubang opisyal sa Sugbo niadtong Sabado sa gabii sa Waterfront Cebu City Hotel and Casino.

“My house is open to everyone, wala koy gitagoan,” pahayag ni Loot sa pakighinabi sa Superbalita Cebu kagahapon.

Sa iyang pakigpulong, si Duterte nibutyag nga nagbaha sa gidili nga drugas ang usa ka kwarto sa balay sa mayor.

Ang presidente nihagit pa sa retirado nga heneral sa PNP nga ipadayon kon gusto niini nga mopasaka og kaso batok niya ug sa kapulisan.

“Huwag ka talagang mag-salig-salig diha nga heneral ka. Hindi ako naaano ng mga heneral heneral diyan. Either magkaintindihan tayo dito o --- magsabi ka lang kung anong gusto mo,” pamulong ni Duterte atubangan sa mga opisyal sa Sugbo.

Apan sumala ni Loot nga wa siya’y plano nga mokiha sa presidente ug mga opisyal sa PNP nga naglambigit sa iyang pangan nga giingong usa sa mga narco-politician.

“I cannot clear my name by doing that. I have to be investigated,” dugang sa mayor.

Siya nibarog nga dugay nang nalimpyohan ang iyang pangan sa Criminal Investigation and Detection Group (CIDG) sa PNP nga nag-imbestigar niya human siya nganli sa presidente nga usa sa mga drug protector niadtong 2016.

Ang presidente nagbilin pa og mensahe alang kang Loot, “So, kung babagsak ka, sorry.”

Si Loot ang usa sa mga mayor nga wa dapita sa private dinner uban sa presidente nga gipasiugdahan sa Office of the Presidential Assistant for the Visayas (OPAV), uban sila si Cebu City Mayor Tomas Osmeña ug Ronda Mayor Mariano Blanco III.

Sa miaging tuig, ang tulo ka mga mayor gitangtangan sa National Police Commission (Napolcom) og gahom sa operational supervision ug control sa kapulisan sa ilang lugar gumikan sa pasangil nga sila giingong nalambigit sa gidili nga drugas.

Nabalik kang Osmeña human sa usa ka buwan. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph