NAGKATAGBO si Presidente Rodrigo Duterte ug kanhi Cebu City Mayor Michael Rama sa lobby sa Cebu City Waterfront Hotel and Casino sa Barangay Lahug, dakbayan sa Sugbo.
Si Duterte gikan nikanaog sa iyang lawak ug mopadulong sa lungsod sa Tabogon dihang gikasugat si Rama.
Ang duha naglamanohay ug nagbinayloay sa ilang mga pahiyom nga gisaksihan sa daghang tawo lakip na ang mga hotel guest nga nilanat og kapin sa duha ka minutos.
Si Rama, nahinabi sa Superbalita Cebu, nagkanayon nga "first akong gi-welcome (si President Duterte).”
Wala na mohatag og dugang detalye si Rama sa ilang mubong panag-istorya.
Ang panagtagbo nila ni Duterte ug Rama maoy ikaduha human ang kanhi mayor sa Cebu City gipasanginlan sa presidente nga ‘drug protector’ niadtong 2016.
“Mas grabe to didto sa Davao among meeting (ni president) kay sit down man gyud to, kini kay padung naman siya (Duterte) lakaw. Eye to eye contact lang mi ug hand to hand connection (with) a little talk,” dugang ni Rama.
Ang duha dugay nang managhigala dihang pulos pa sila mayor sa ilang tagsatagsa ka siyudad, si Duterte sa Davao ug si Rama sa Cebu.
Matod ni Rama, gawas sa pag-welcome, si Duterte iyang gipahimangnoan nga mag-amping kanunay sa iyang mga lakaw ug nihatag sa iyang suporta sa presidente.
“I am with you and welcome to Cebu,” pulong ni Rama.
Si Duterte niadto sa Tabogon aron paghimamat sa iyang ig-agaw, si Mayor Seigfred Duterte ug pagtambong sa piyesta sa lungsod. (PAC)