DAGHAN sa mga kaigsuonan natong mga Pilipino ang nakauyon sa gibuhat sa atong Presidente Rodrigo Roa Duterte nga bugtuon na ang atong pagpa miyembro sa International Criminal Court (ICC) tungod kay naghinubra na ang ilang pagpanghilabot sa sistema sa atong hustisiya sa Pilipinas.
Ang extra-judicial killings ilang gituohan nga mugna kini sa atong gobyerno labot sa kampanya sa batok sa ginadili nga druga, apan sukad pa kaniadto sa mayor pa sa Davao ang atong presidente, bisan ang inbestigasyon sa Commission on Human rights walay naproyebahan nga iya kini sa lokal nga gobyerno sa Davao, ug karon nga presidente na ang atong mayor, nga subsob gihapon ang pagpamatay, apan walay ebedensiya nga gobyernong nasiyunal ang nagpaluyo.
Sa diretsong pagka-estorya, mugna lang kini sa mga kaaway niya sa politika nga
dili makadawat nga nahimong presidente ang probinsiyanong mayor sa Dakayan sa Davao, kining tanan gibasehan sa oposisyon sa giyawyaw sa atong presidente panahon sa kampanya nga iyang himuong tapukanan sa mga patay ang Manila bay, sa mga kreminal ug tigpayuhot ug droga kon mahimong na siyang presidente.
Apan ang atong Korte,proyeba baya o ebedensiya ang gikinahanglan dili estorya, busa sukad pa kaniadto nga mayor pa siya, ug hangtud karon nga presidente na walay nagpamatuod nga siya maoy utok sa patay nga nahitabo sa atong nasud ang tanan mugna lang sa kaatbang sa politika, busa, dili angay manghilabot ang ubang nasud sa pag-inbistiga, tungod kay independente kita ug may ka-ugalingong hustisiya nga angay irespito.
Pero dunay atong istorya nga kon magpataka kita makadaut usab sa atong ka-ugalingon, sama sa pagsulti sa atong presidente nga dili mosugot ang China kon dunay magtinguha nga mabagsakon ang iyang administrasyon.
Sa tinuod lang, walay labot ang China sa politika kon magkina-unsa ang man dagan sa atong gobyerno, tungod kay kon dili kita gusto nga hilabtan sa International Criminal Court (ICC), sa pag-imbestiga mga krimen nga nahitabo sa atong nasud? Labaw pan’g wala silay katungod nga manghimasok sa kalihukang politika sa Pilipinas.
Kong atong pasagdan kining China nga sa hinayhinay gi-ilog ang atong teritoryo, basin kon magmata nalang kita og buntag nga ang atong nasud sakop na sa China.
Pwerte nilang pagara, gipahimuslan nila ang pagpakigsuod sa atong pangulo sa ila tungod kay midistansiya man kining administrasyuna sa Estados Unidos, tan-awa ra ninyo ang Taiwan, nga matud pa nila ila na nga probinsiya wala nila gi-recognize nga usa ka nasud, nakapanghilabot ba sila? Wala, kay hadlok sila sa America.
Karon kay nakita man nila nga gustong mobuwag ang Pilipinas sa America, gipahimuslan nila ang higayon gusto na nilang hilabtan ang politikanhong kalihukan sa atong nasud.
Karon ari ta sa usa ka pangutana, asa man ta, sa China nga mangilog og teritoryo? O America nga modepensa sa mga nasud nga buot ilogon ang ilang teritoryo. Ang America mopalit og teritoryo nga ibaligya, apan nungka nga mangilog. Isip-isip daw.