SECTIONS
Thursday , June 21, 2018
SUPERBALITA DAVAO

Ex-police, 1 napatay sa drug raid

KORONADAL CITY - Duha ang patay sa drug raid alas 3:10 sa kadlawon niadtong adlaw nga Sabado sa probinsiya sa South Cotabato.

Giila ang mga nakabsan sa kinabuhi nga sila Edgar Porras, 48, minyo, kanhi pulis nga nag-AWOL ug Henry Vera, mga molupyo sa Barangay Sto. Niño, South Cotabato.

Sa taho gikan sa South Cotabato Police Provincial Office nga gironda sa hiniusang puwersa sa Philippine Drug Enforcement Agency (PDEA-12) ug kapulisan ang balay sa mga suspek apan misuloy sila sa pagsukol sa raiding team.

Napugos ang mga awtoridad sa pagpabuto sa ilang mga armas nga maoy hinungdan sa kamatayon nila Porras ug Vera.

Nakuha gikan sa ilang posisyon ang duha ka .38 revolver nga armas, mga bala, 15 ka pakite sa shabu og mga drug paraphernalia.

Ang raiding team nagbitbit og 32 ka search warrant nga giisyu sa korte apan ang uban sa mga target nga sila John Gonzales ug Rene Ybanez ang nakaipsot atol sa drug raid.

Dugay na nga gipanid-an ang mga napatay sa mga awtoridad nga nalambigit sa paggamit ug pagpamaligya og gidiling druga sa probinsiya sa South Cotabato, Sultan Kudarat ug mga siyudad sa Tacurong ug Koronadal.

Apan ang pamilya sa mga napatay nanghimakak nga wala misukol sila Porras ug Vera gumikan wala silay armas og ang narekober nga druga ug duha ka .38 revolver nga armas mga planted lamang.

Sa kasamtangan ang kapulisan sa Sto. Niñ South Cotabato ang padayon nga nag-imbestiga og andam sab nilang atubangon sa korte ang reklamo sa pamilya sa mga napatay sa raid. (Edgar Fuerzas)


VIEW COMMENTS