SECTIONS
Thursday , June 21, 2018
SUPERBALITA DAVAO

DepEd 11: Di pinugsanay ang Brigada Eskuwela

DILI pinugsanay ang pagsalmot sa Brigada Eskuwela karong umaabot nga Mayo 28 hangtud Hunyo 2.

Kini ang gibutyag ni Department of Education (DepEd) 11 spokesperson Jenelieto Atillo kinsa nagpahibalo sa mga ginikanan ug tinun-an nga boluntaryo lamang ang maong aktibidad.

"Boluntaryo lamang kini, dili pinugsanay nga manglimpyo ug moadto sa mga tulunghaan," ingon ni Atillo.

Dugang sa opisyal nga di mamahimo nga mobayad aron lamang mapalista ang pangalan sa ilang mga anak nga maoy rason ang pag-priority kanila panahon sa enrollment.

"Kini baya ang sagad nga mahitabo, apan mali kini gumikan naa na tay pre-enrollment nga gipahigayon, buot pasabot kung naka-Grade 7 na ang estudyante, automatic na siya enrolled sa Grade 8," dugang niya.

Butyag pa ni Atillo nga gawas nga boluntaryo ang Brigada Eskuwela, wala sab kini nagapangolekta og kuwarta aron maoy ipamalit og mga materyales sud sa tunghaan.

"Naay uban nga voluntary pod daw ang ilang paghatag, apan pag-abot sa panahon niini, magkalat dayon sa social media nga gipangolektahan sila sa mga magtutudlo, sa maong hisgutanan, luoy ang atong mga teachers mabutang sa alanganin," butyag pa ni Atillo.

Gidasig ni Atillo ang mga ginikanan ug estudyante nga mosalmot sa maong programa ug kung mamahimo magdala og mga cleaning materials aron maoy gamiton sa pagpanglimpyo aron mahimong andam ang mga lawak sa pagsugod sa klase karong Hunyo 4, 2018.

Ang Brigada Eskuwela nagsugod niadtong tuig 2010. (Jeepy P. Compio)


VIEW COMMENTS