Mongaya: Babag bisag wa nay piliay

MAKAPAHIMUOT kining balita nga usa si Mayor Tomas Osmeña sa tulo ka mga mayor ang wala imbitaha sa panihapon sa mga mayor kuyog ni Presidente Rodrigo Duterte diha sa Waterfront Hotel sa Lahug.

Natural, si Presidential Assistant for VIsayas Mike Dino man ang nangimbitar. Maniguro gyud kini nga wala si Tomas ug ang makaduol lang kang Digong mao si Bise Mayor Edgar Labella.

Nagpakita lang kini kon unsay kinaiya niining Dino ug makapasamot hinuon sa kalagot sa ubang taga Syudad sa Sugbo kaniya.

Manghinaot lang ko nga di maangin ang imahen ni Presidente Duterte niining mga palpak nga lakang ni Dino sama sa nahitabo sa mayorya sa mga barangay kapitan nga iyang gipaluyohan kay mayorya ang nangaparot sa miaging piliay.

Nakita man sa tanan nga maayo ang patinagdanay ni Tomas ug Digong diha sa Cebu City Sports Center atol sa pag-abli sa Philippine National Games (PNG).

Negatibo ba ni Tomas nga nabalita nga wa siya imbitaha ni Dino sa dinner uban ni Digong diha sa Waterfront? Nabonggo na hinuon nga si Dino ang nagmaniubra gihapon bisan klarong wa siya maka-deliver sa miaging piliay.

Nganong nagdali man sa pagsibat ang presidente gikan sa maong dinner uban sa mga mayor? Nganong wala may labot si Dino sa maong okasyon nga gidalian ni Digong?

Pederalismo

Padayon ang kampanya sa pipila ka kalihokan alang sa pederalismo pinaagi sa pagporma og koalisyon nga mosalmot sa party-list election karong umaabot nga 2019.

Mao kini ang gianunsyo ni National Alliance of Movements for Federalism president ug Metro Manila Development Authority (MMDA) chairman Danny Lim atol sa usa ka tigum dinhi sa Syudad sa Sugbo sa miaging Sabado.

Mao sab kini ang sulti ni Tuburan Mayor Aljun Diamante nga naa usab sa Cebu Movement for Federalism (CEMFED) ug sa League of Mayors of the Philippines (LMP) dihang nagtigum ang Political Officers League of the Philippines (POLPHIL).

Atong nasayran nga giusab na ang kahulogan sa NAMFED ngadto sa Nagkakaisang Alyansa ng Masa sa Federalismo Coalition.

Isyu sa UC

Hapit na mahuman diay ang Mayo ug sayo niining buwana atong gihisgutan ang usa ka kontrobersya kabahin sa usa ka dean sa University of Cebu nga nisang-at og reklamo diha sa National Labor Relations Commission (NLRC) ug sa korte human gitaktak nga walay balidong basehanan.

Wa pa kita makalimot nga nisaad kitang sumpayan pa ang maong asoy labi na sa unsay nahitabo didto sa Korea dihang nangadto ang faculty.

Apiki lang gyud karon ang atong espasyo mao nga atong kutloon ang affidavit mismo sa reklamante karong sunod lindog sa di pa mahuman ang Mayo. (@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph