LOOT. Naa gihapon sa pangisip ni Presidente Duterte si Daanbantayan Mayor Vicente Loot nga nahilambigit sa illegal drugs dinhi sa Sugbo. Sa pagbisista ni Presidente Duterte niadtong Sabado hangtod Dominggo sa Cebu iya gihapon gihisgotan si Mayor Loot, nga daw usa ka narco-general.
Abi na ko nga sa nanglabay nga mga adlaw ug buwan nahikalimot na si Presidente Duterte ni Mayor Loot sa illegal drugs nga isyu. Atol sa iyang pakig-meeting sa mga mayor dinhi sa Cebu city niadtong Sabado ug sa iyang pagpamista sa Tabogon, Cebu diin si Tabogon Mayor Zigfred Duterte iyang ig-agaw, iya na sad gilabhan si Mayor Loot.
Si Mayor Loot sa wa pa mosulod sa pulitika, usa na ka police general. Migimaw ang iyang ngalan nga narco-general dihang gihinganlan siya ni Kerwin Espinosa, ang naila nga drug lord didto sa Leyte ug karon detinado. Matod pa, nagkaila si Kerwin dihang si Loot ang PNP regional director sa Region 8 nga anaa sa Tacloban city and opisina.
Sa iyang meeting sa mga mayor sa Cebu city, wa maapil o wa moapil si Loot, ginganlan ni Presidente Digong si Loot ug si retired police general Marcelo Garbo, nga dunay kalabutan sa illegal drugs nga negosyo. Gipangita pa gani ni Presidente Duterte si Loot ug gihagit nga paundangon. Pagkaluoy ni Mayor Loot. Ngano bitaw ni-enter sa pulitika?
Di sad ta motuo nga way gibasihan nga ebidensya si Presidente Digong batok nila ni Loot ug Garbo sa ilegal nga negosyo. Di ni pagdayeg sa law profession, pero si Presidente Digong abogado ug nakahibawo siya kon unsay ebidensya o dili. Si Presidente dunay usa ka buhi nga ebidensya, si Kerwin.
Pung pa ni Presidente Duterte nga “nagbaha ang kwarto ni Loot sa illegal drugs”. Usa ka pung nga katuhoan-dili. Apan usa ni ka pasumbingay ni Presidente Duterte nga hangtud karon duna gihapon kalambigitan si Loot sa illegal drugs nga negosyo.
Ang tanan gipamung ni Presidente Duterte batok ni Loot matawag nga libelous. Gani, gihagit ni Presidente si Loot nga ikiha siya. Apan kinsay mokiha og presidente nga kasamtangan naglingkod pa? Ang presidente di makiha kon sa English pa “immune from suit”.
Nisamot kaitok si Presidente Duterte ni Loot dihang iyang gihagit si Presidente nga iprobar nga dunay siyay kalambigitan sa negosyo sa illegal drugs. Pung ni Duterte ngadto ni Loot: “I will prove to you that you’re dead. ‘Wag mo akong lokohin. ‘Wag mo akong – hindi ako disenteng tao na magsalita ka lang hamunin mong...Hihiritan kita.”
Puno ug salabton ning mga pung ni Presidente Duterte batok ni Loot nga makatuo ta nga kadtong nahitabo kaniya sa miagi nga semana didto sa pantalan uban sa iyang pamilya di diay “ambush me”. Usa gyud diay to ka warning.