LAING suwat-reklamo ang atong nadawat gikan sa mga kabanay sa mga piniriso sa Cebu Provincial Detention and Rehabilitation Center (CPDRC).
“Kaming mga kabanay sa mga piniriso diha sa Cebu Provincial Detention and Rehabilitation Center (CPDRC) naghugpong nga mohangyo kanimo nga unta mapaabot sa atong Gobernador kining among problema. Taud-taud na kining maong problema apan amo lang gisabot sa pagtuo nga mahatagan ra kini og kasulbaran ni OIC warden Roberto Legaspi. Apan samtang nagkadugay mas migrabe naman hinuon.
Kining among problema kabahin aning among mga piniriso diha nga dili madala sa korte panahon sa hearing kay ang rason walay sakyanan kay guba ug walay maka-escort nga guwardiya. Dako kaayo among pagtuo nga wala makahibalo ang gobernador ining maong problema.
Kay kon naka-hibalo pa siya dili gyud mi motuo nga dili niya hatagan og pagtagad ning maong problema. Nakahibalo gyud na siya unsa kadako ang epekto ani ngari kanamo ug sa among kaliwat nga priso kon dili nila madala sa korte panahon sa hearing kay abogado gud na siya.’
Ang among ipaabot niya nga: Una, ilang obligasyon ang pagpatunga o pagdala sa piniriso ngadto sa korte kon mag-hearing.
Ikaduha, kon mangaguba man ilahang sakyanan, ilaha gihapon nang responsibilidad ang pagpangita og mekaniko nga moayo. Dili kay magsalig lang sila anang mekaniko nga piniriso ra gihapon.
Kanang maayong laki diha nga OIC wala gyud maghuna-huna namo nga pwerte gani namong tigum sa bukid pangbayad sa amoa abogado inig hearing, apan ma-postpone lang ug malangay ang kaso tungod sa pagpabaya sa iyang trabaho. Angay sad niya huna-hunaon nga bisan pa ma postpone ang hearing magbayad gihapon mi sa abogado.”
(Maayo unta og maatiman ni sa Gobernador. BGN)
(bobbygnalzaro@gmail.com)