Lamberto G. Ceballos
Cawayan, Dalaguete, Cebu
HINAY nga gipadagan ni Diego ang iyang awto nga karon nagsubay na sa Marcelo Fernan Bridge nga nagdugtong sa mga dakbayan sa Mandaue ug Lapu-Lapu. Nagpaingon na siya sa Mandaue nga iyang maagian pauli sa ila sa Mabolo, Cebu City. Gikan siya sa balay sa iyang amigo nga nahimutang sa Basak-Iba, Lapu-Lapu, diin may ‘suyop’ ug tagay nga gihimo nilang tulo. Uban niya sila Samuel ug Simon. Apan ‘wais’ siya. Wa siya magpalabi. Usa ra ka botelyang beer ang iyang giinom. Natagbaw siya’g sinuyop sa aso ug inalisngaw sa shabu. Taudtaod nananghid siya nga mopauli. Sa iyang banabana, okey pa nga mo-drayb siya. Lawom na ang gabii ug dili na huot ang trapik. Kuyaw lang kon masugatan siya’g police patrol ug sitahon siya.
Dihang diha na siya sa tunga-tunga sa taytayan may nabatyagan siyang usa ka babaye nga nag-inusara nga nagtindog ug naglantaw sa halayo. Misanting ang gana sa iyang pagka lalake. Patay kang bata ka, matod niya sa kaugalingon, trip ko nga luguson ka! Gipahunong niya ang awto tungod sa nahimutangan sa babaye.
“Miss, nag-unsa ka diha? Lawom na ang gabii!” matod ni Diego nga miabli sa windshield.
Milingi ang babaye ug miingon nga masuk-anon, “Maghikog ko! Ayaw panghilabot!”
Misanting ang mga dalunggan ni Diego. Nanaog siya sa awto ug gigunitan sa bukton ang babaye. “Kon magpakamatay ka, lipaya usa ko!” ni Diego nga nagsiga ang mga mata nga mitutok sa babaye ubos sa dan-ag sa suga sa taytayan sa ilang tungod.
Wa makatingog ang babaye ug wa motukol dihang gipasulod siya ni Diego sa awto. Gipadagan ni Diego ang awto ug didto kini sangko sa usa ka motel sa Mabolo. Sa usa ka lawak gipahubo ni Diego ang babaye. Naghubo sab siya.
“Ako si Diego. Unsay ngalan mo?” ni Diego nga misamot ang gana nga nagtan-aw sa hubo nga lawas sa babaye.
“Katya!”
“Di ka magmahay nga mikuyog nako, Kat. Lipayon tika una patya,” ni Diego nga mipakita sa iyang rebolber.
“Okey lang. Maoy tuyo nako nga magpakamatay. Mabdos kog tulo ka buwan. Si Jack milampanog, tua sa Manila. Di mangako sa iyang responsabilidad!”
Gigakos ni Diego si Katya. Gihagkan sa mga ngabil. Dayon nanghigda sila sa kama, diin gipadayon nila ang ritwal sa daklit nga gugma.
Human sa ilang duwa sa kama gipunit ni Katya ang rebolber ni Diego.
“Sige, patya na ko!” ni Katya nga mitunol sa armas ngadtong Diego.
Gidawat ni Diego ang armas. “Di ko kaako pagpatay nimo. Kon mosugot ka akoy mangamahan sa imong anak, Anugon ang imong katahom ug ka-sexy kon mamatay ka. Ulitawo ko. Mag-live in ta. Okey?”
Gigakos ni Katya si Diego. “Sugdan ko’ng higugmaon ka, Diego!”
Mibawos paggakos si Diego kang Katya. Nagtapot na sab ang ilang mga ngabil ug lawas. Unya nanghigda sila’g balik sa kama. (Katapusan)