GIHUGPAAN sa daghang fans niadtong Sabado ang Kapuso Mall Show sa cast sa “Inday Will Always Love You” sa Gaisano Island Mall Mactan.
Sa wala pa ang show, among nakauban ang bidang si Barbie Forteza, Derrick Monasterio, Super Tekla ug Manilyn Reynes sa usa ka paniudto sa Golden Cowrie sa Lahug.
Ang Cebuanang si Manilyn kay maayo lang gihapon mobinisaya, pero na-shock siya kay grabe na kuno ka-boom ang Cebu.
Excited nilang gipahinungod ang “Inday Will Always Love You” sa mga Cebuano kay 80% sa maong teleserye dinhi gi-shoot sa Sugbo, sama sa isla sa Bantayan, Little Amsterdam sa Sirao, Sto. Nino church ug uban pa.
Ang “Inday Will Always Love You” nag-premiere na gabii, Lunes Mayo 21, sa GMA-7 primetime.
Bamboo
Karong Independence Day, June 9, mag-concert ang rockstar ug The Voice coach nga si Bamboo Manalac sa Sugbo grounds sa SRP.
Personal nga nanawag nako ang usa sa nagpasiugda sa concert nga si Ms. Aida Patana kay gawas ni Bamboo, guest sad dinhi ang iyang mga gwapang anak nga The PowerTrio, ang Cebu-based talents Indephums, Emping, Sheila and Sheina, The Agadiers ug uban pa. Ang tickets mapalit sa P700 (Gen. ad) ug P1,500 (VIP).
Mag-senador
Kinsay nag-ingon nga walay “K” si Agot Isidro nga modagan nga senadora?
Base sa Wikipedia, ang actress-singer gradwado sa UP-Diliman sa kursong Interior Design. Nigradwar siyang magna cum laude sa Fashion Institute of Technology sa New York ug dunay master’s degree sa communication sa Ateneo de Manila University.
Bukas ang 51-anyos nga si Agot sa ideya nga modagan nga senador sa 2019 ubos sa Liberal party. Kon mahitabo, silay magtigi ni Mocha Uson. Kombati!
Livestreaming
Pinaagi sa livestreaming, nakauban namong mga sakup sa entertainment group sa Sugbo si Bea Alonzo ug Direk Ruel Bayani.
Nahitabo ni atol sa digital conference sa pelikulang “Kasal” ni Bea ug Direk Ruel niadtong Mayo 17 sa 9501 Restaurant sa ABS-CBN isip pasalamat usab sa P10 million opening day sa maong pelikula.
Kaming mga press sa Cebu naa ra sa balay ni Ms. Josie S. Pereyra nagtan-aw nila sa laptop pero sa matag-karon ug unya, mangutana sad mi ug ila sad mi i-acknowledge. Ngilngig na kaayo ang technology karon!