NAIGO sa iyang dughan ug bun-og sa nagkadaiyang parte sa lawas ang usa ka pulis human gitabangan sa kaubang priso niadtong Domingo sulod sa Misamis Oriental Provincial Jail (MOPJ) sa Tiano St-Corrales St. dakbayan sa Cagayan de Oro.
Nagpaalim sa iyang samad nga naangkon si Police Office 3 Alejandro Ubanan kinsa anaa karon sa Northern Mindanao Medical Center (NMMC), ning dakbayan.
Gibutyag ni MOPJ Warden Dominador Tagarda sa SunStar SuperBalita nga nagpatuman sila sulod sa prisuhan og no smoking policy ug usa kini si Ubanan sa gitahasan nga maoy mobadlong sa kaubang priso nga dili manigarilyo sulod sa prisuhan.
Apan samtang gipangkuha niini ang mga sigarilyo sa priso kalit lang kining giambakan, lain ang nagbunal niini sa ulo, lain ang nagsumbag ug lahi sab ang nidunggab niini sa iyang dughan nga bahin hinungdan sa kagubot sulod sa prisuhan.
Daling gidala ang biktima sa NMMC ug sa kasamtangan nga sitwasyon niini “successfully done” ang operasyon tungod kay nakita sa ultra sound nga milapas ang ice pick paingon ngadto sa iyang dughan.
Hugot nga gikondena ni Tagarda ang panghitabo gumikan kay taliwala priso si Ubanan aduna kini tawhanong katungod nga kinahanglan dili abusohan sa kaubang priso.
Upat sab ka mga piniriso ang ilang giimbestigahan karon nga nalambigit sa pagpangluba ug pagpanukmag sa biktima.
“Sa pagkakaron, duna kitay upat ka priso nga giimbestigahan basi sa pahayag sa atong biktima kay siya man ang nakakita ug makatudlo kinsa sa mga priso ang niluba," matud ni Tagarda.
Dugang niini nga wala usab dalaw nga mahitabo karon adlawa lakip ang pagdawat og pagkaon hangtod dili mokooperar ang uban priso sa imbestigasyon sa kaso.
Gikasubo kini ni Tagarda tungod kay taliwala nga labihan ang ilang paningkamot nga hapsay ug malinawon ang sulod sa prisuhan duna gyod pipila ka priso pabilin nga gatulibagbag ug gahimo susama niini.
Kon mahinumduman nasuta nga kini si Ubanan ang lakip sa lima ka mga sakop sa CAPPD (Crimes Against Person and Property Desk) nga responsible sa pagkawala sa usa ka negosyante nga si Enrique Fernandez.
Gikan sa pagkapriso niini sa Lumbia City Jail gibalhin dayon kini sa MOPJ ug uwahing gikalambigitan niini mao ang pagkabartolina human giingong nanugo og bayot ug gipa live show sa iyang atubangan.
Sa pagsulat ning balita, luwas na sa makuyaw’ng kahimtang ang biktima ug ang pamilya niini andam mopasaka og kaso batok sa mga mitabang niini sulod sa prisuhan.