NAGHUGPONG ang mga transport group aron hiusahan ang sugyot nga patas-an ang plitehan gikan sa P7.50 ngadto sa P10 sa Northern Mindanao.
Gibutyag ni National Confederation of Transport Union (NCTU) Regional Coordinator Joel Gabatan nga ila kining naplanohan nga padak-an tungod sa walay puas nga pagsaka sa presyo sa gasolina lakip na ang walay puas nga pagpangdakop diin ang mga driver naapektuhan na niini labina ang inadlaw nga kita.
Nagpwersa ang NCTU lakip ang The Solidarity of Transport Alliance in Northern Mindanao-Pinagkaisang Samahan ng mga Tsuper at Operator Nationwide (Starex-Piston) nga isugyot kini nga plitehan aron makiangayon ngadto sa mga driver ug operator.
Sa iyang bahin ni Ringo Lago ang Secretary General sa Starex Piston Northern Mindanao gipasabot niini nga makiangayon ang P10 nga plitehan tungod kay sa usa ka public hearing nga gipahigayon ug nakita nga angayan na kining usbawan.
“Sa akoa angayan lang kay naktia nato ang presyo sa fuel product naa nasab usbaw mao nga nangayo ta ug usbaw sa plitehan,” pasabot niini.
Kon ang 7.50 nga plitehan anaa lamang sa P40 ngadto P42 ang litro sa gasoline karon misaka na sa P47 ngadto P49 nga angayan na gyod iusbaw sa plitehan labina sa mga public utility jeepney.
Kahinumduman ang naaprob na sa konseho sa siyudad ang usbaw sa plitehan sa motorela dinhi sa siyudad sa Cagayan de Oro diin mahimong na nga P7.00 ang regular fare gikan sa kasamtangan nga P6.
Gihulat na lang nga mapirma ni Mayor Oscar Moreno aron mapatuman ang maong usbaw.