RIDO ang usa sa gidudahang motibo sa pagpang-ambush sa usa ka mayor ug convoy niini mga alas 8:30 sa buntag niadtong Domingo, Mayo 20, sa Barangay Cabasagan, lungsod sa Pantao Ragat, Lanao del Norte.
Si Police Superintendent Lemuel Gonda, tigpamaba sa Police Regional Office (PRO)-Northern Mindanao, nibutyag nga sa inisyal nga report nga ilang nadawat nasuta nga mga alas 8:30 sa buntag niadtong Domingo si Pantao Ragat Mayor Lacson Lantud nangayo og security escort.
Kini aron susihon ang nagpadayon nga proyekto sa dalan ug elektrisidad sa Barangay Cabasagan.
Mga alas 9:00 sa buntag miadto ang mayor sa lugar sakay ang kolor itom nga Toyota Hi-Lux nagdala sa plate number nga VQ 3429 uban sa mga nag-convoy kaniya.
Mga alas 9:26 sa buntag nadawat sa kapulisan ang report nga dunay pagpang-ambush nga miresulta sa pagka-angol sa mayor ug pagkamatay sa laing upat ka mga kauban sa convoy.
Giingong moabot sa lima ngadto napulo ka mga armado ang ni-ambush sa grupo ug nagpaarak sa ilang mga dalang armas.
Giila ang mga namatay nga sila si Police Officer (PO) 1 Mahid Macalaba; Khalic Disamburon, bag-ong napili nga barangay kapitan sa dapit; ug Casanuding Hasim ug usa ka giila si Tarapas.
Abtik sab nga nakaresponde ang kapulisan sa Pantao Ragat Police Station nga giunhan ni SPO1 Joe Denore kinsa maoy nagbantay sa seguridad sa mayor ug nidala niini sa tambalanan.
Samtang nagpahimutang gayud dayon ug emergency response ang kapulisan ug gipangtabang ang mga nasamdan.
Sa crime scene, duha ang dead on the spot nga mao sila si Disamburon ug Tarapas samtang patay dihang nahidangat sa Balo-i Provincial Hospital si Macalaba ug Hasim sa Adventist Medical Center, Iligan City.
Tulo sab ang samdan nga giilang sila si PO1 Hamza Mangonte, SB Member Acmad Magomnang, ug Farmon Macarimbang nga anaa sa Adventist Medical Center.
Gibutyag ni Gonda nga aduna nay gitukod nga task force aron mag-imbestigar sa pagpang-ambush.
Gisalikway sab niini ang motibong election related kini nga kaso tungod kay pagduda sa kapolisan nga mayor ang puntirya ug rido sa pamilya ang motibo.