GIKAN sa pagtinda daplin sa karsada ngadto sa pagpamunit og lata iyang gihimo matabangan lang ang iyang inahan nga usa ka yaya sanglit sayo nga nitaliwan ang iyang papa.
Si Marilyn Planco, nagtubo nga wala makapahimulos sa pagpangga sa iyang amahan sanglit 6 anyos pa siya, namatay na ang iyang amahan nga si Daniel Planco nga usa ka security guard sa kanhi Magellan Hotel, sikat nga hotel kaniadto, apan nasunog sa sayong bahin sa 1990s.
Gumikan niadto, grabe ang kalisod nga ilang giatubang uban sa iyang mama nga si Nieves Cardosa.
Sila nanginabuhi sa dalan Colon niadtong dekada 70 pinaagi sa pagtinda og tubig, itlog, orange, sigarilyo, maglukdo sa plantsado nga sinina nga gilabada sa iyang mama ug diha ra sila nangatug sa sidewalk.
Gumikan sa iyang determinasyon nga makaeskwela, niadto siya og Davao sanglit aduna siyay stepbrother nga adunay gamay nga negusyo.
Didto siya nilampos sa high school, apan nibalik ra gihapon dinhi sa Sugbo para moeskwela sa college.
Matod pa ni Planco nga iyang damgo sa kinabuhi mao ang office secretary o madre sanglit mao kini ang iyang nakita nga maayong trabaho, apan wa siya magdahom nga aduna pay nindot nga kinabuhi nga gihatag kaniya ang Ginuo.
Tuod man, na-enroll siya sa Southwestern University (SWU) sa kursong Bachelor of Science Major in Banking and Finance apan usa siya ka working student.
Nahimo pa siyang janitress ug pagkasunod tuig, nahimo siyang secretary sa dean sa Teacher’s College hangtod nabalhin siya sa President’s Office.
Upat ug tunga ka tuig niyang giantos nga working student aron lang molampos sa pagtuon sa kolehiyo.
Panaghimamat
Dihang nakatrabaho na siya sa Department of Agriculture (DA) human siya ni-graduate sa college, iyang gikaila kaniadto si Peter Unabia, karon usa na ka congressman sa Misamis Oriental.
Kaniadto, trabahante pa si Peter sa kompaniya nga konektado sa DA ug didto nagkasuod sila nga sama sa magsuon, apan niundang si Peter og trabaho.
Nagtukod og negusyo si Peter gamit ang P12,000 nga separation fee niadtong dekada 90.
Nawagtang ang ilang komunikasyon human niadto ug si Planco nihawa sa DA aron mobalhin sa SWU isip secretary sanglit maayo ang tanyag kaniya.
Gusto usab niya nga makaeskwela ang iyang anak nga si Jeric.
Sa wala damha, nagkakita sila og balik ni Unabia ug gitabangan ug gigiyahan siya ni Peter aron makapabarog og iyang kaugalingon nga ginagmay nga negusyo.
Niadtong tuig 2000, natukod ang iyang unang branch sa Snr. Pedro Lechon Manok sa Wireless sa dakbayan sa Mandaue.
Kadto maoy iyang gimatuto uban sa paningkamot ug pag-ampo sa Ginoo.
Paglabay sa katuigan, nakatukod na usab siya og laing branch sa Snr. Pedro bunga sa iyang determinasyon nga makabarog sa iyang kaugalingon sanglit usa siya ka single mother.
“I never expect that I reach this kind of life. Mao nay nakanindot nga you expect less or nothing, and then you will just work hard, be thankful and share everything bisan nagkalisod ka,” matod ni Marilyn.
Sa pagkakaron, ang Snr. Pedro ni Planco nikatap na sa dakbayan ug lalawigan sa Sugbo ug naa sad siyay sangang buhatan sa Siquijor.
Gawas sa pagnegusyo, gikalingawan usab ni Planco, kinsa naila sa iyang mga higala nga “Mommy” hilabi na sa fitness gym, mao ang paghatag og bili ug importansiya sa kahimsog sa panglawas.