NASUNOG ang 25 ka mga panimay sa Sitio Riverside, Barangay Lorega San Miguel sa syudad sa Sugbo kagahapon sa buntag, diin ang 19 niini ang hingpit nga naugdaw ug unom nakan-an lang sa kayo.
Nadawat sa kabomberohan ang alarma sa sunog alas 10:15 gahapon sa buntag diin giisa nila sa 2nd alarm alas 10:18 ug pagka alas 10:30 ngadto sa 3rd alarm na ang kabomberohan.
Matod ni Fire Chief Insp. Noel Nelson Ababon sa Cebu City Fire Marshall nga na kontrolar nila ang kayo pagka alas 10:39 na ug gibanabana nga nidanyos kini og P350,000.
Sa resulta sa inisyal nga imbestigasyon sa Bureau of Fire Protection (BFP), nagsugod ang kayo sa panimay ni Susima Alvarado nga gituohan nga electrical miss use.
Matod pa, nakakita nga mi spark ang linya sa kuryente sa sulod sa maong panimay nga ginama lang sa light materials nga daling mikatap sa mga silingang panimay.
“Base sa pag imbestigar sa atong mga imbestigador sa tag-iya gyud sa balay, naa may naka-witness nga bahin sa electrical kay naa may ni spark, ila paning gisubay sa pagkakaron,” matod ni Ababon.
Ipatawag sa BFP ang saksi ug si Alvarado aron makuhaan sila ug pamahayag alang na sa pag kompleto sa imbestigasyon.
Nakatabang usab sa daling pagkatap sa kayo sa mga silingang kabalayan tungod sa ka uga sa mga dapat niini tungod sa kainit sa panahon.
Awhag ni Ababon sa publiko nga ning panahon sa ting init kinahanglan nga mag amping ilabi na sa koneksyon sa ilang kuryente.
Nakasugat og problema ang mga fire fighters tungod sa kagamay lang sa dalan nga mihimo pa sa pag sumpay sumpay sa ilang mga hose ang mga bombero dungan sa kadaghan sa mga nasunogan nga misugat kanila nga nagdala mga butang.
Si Gerald Alvarado, anak sa tag-iya sa sinugdanan sa sunog, nagkanayon nga kalit kaayo ang hitabo.
“Gisuwayan nako pagpawong pero dili na man gyud mada, mao to ako nalang gibiyaan bisan gani mga sinina wala koy nadala,” matod ni Alvarado.
Nakatala lang ang BFP og usa ka tawo nga napaso sa nawong nga daling gidala sa tambalanan aron matagaan ug tambal ang paso niini. (AYB)