WA makauyon si Cebu City Councilor Joel Garganera sa tag P16,000 nga bayranan sa Sangguniang Kabataan (SK) matag barangay ngadto sa Department of Interior and Local Government-Cebu City (DILG) para sa mandatory training.
Nibutyag si Garganera nga adunay daghang nireklamo kaniya sa pagbayad og P16,000 matag barangay para sa mandatory training ug SK Federation meeting karong Mayo 28-29.
Kasagaran sa wa makabayad pa mao kadtong mga barangay kon diin ni-resign ang ilang mga treasurer tungod kay nidagan sa laing posisyon ug mga accounts nga gi-on hold sa Commission on Audit (COA).
“What really alarmed me karon, ang city director si Joy Calvo. We just talked. She said that no SK chairman can participate in the election this coming (May) 28 if they cannot pay the P16,000 diha sa CIT-U unya because they will not issue a certificate of appearance,” sigon ni Garganera.
Sigon sab niya nga kon di makabayad ang mga SK, di kini makabotar sa SK Federation Election.
“As I talked to her (Calvo), akong giingnan unsay primordial, unsa may importante, ang right to vote or ang pagbayad? Mura mag you deny them of their right to vote their leaders in their federation because of non payment,” nagkanayon si Garganera.
Apan giklaro kini ni Department of Interior and Local Government (DILG) Cebu City Calvo nga ang mga partisipante mamahimong makaapil ug makabotar sa maong pederasyon.
“Ang katong na kuan namo ni Sir Garganera, nasayop kog sulti kay wa pa man gud kaabot og 50 percent ang nakabayad sa katong mandatory training. So, sa akoa lang na nga ang wa makabayad atong sa (Mayo) 17, kanang gi pre-requisite nako siya karong (Mayo) 28,” giklaro ni Calvo.
Dugang ni Calvo nga nangayo siya og tambag gikan sa ilang regional director kabahin sa isyu.
“Now nangayo kog advice sa among RD. Niingon si RD nga paapilon gyod only lang nga dili makuha nila ilang certificate of participation nga gi issue sa CIT-U. So makaapil ang tanan SK Chairperson nga nakatambong og mandatory training,” sumala ni Calvo.
Matod ni Calvo sa Superbalita Cebu, ang pagbayad sa P16,000 di na problema sa mga SK, apan sa barangay. (Kate F. Denolang & Treshea Mae Phrea Y. De Pio – STC Intern)