DEAR Noy Tikyo,
Kining akong problema mahitungod sa akong amiga.
Tawga lang ko og Harry, 26 anyos, ulitawo. Kining akong amiga, tawgon lang nato og si Cora, 24 anyos. Ako siyang classmate sa high school kaniadto. Naa siya'y uyab karon ug 2 na sila ka tuig.
Makaingon ko nga niadto pa lang, suod na gyud mi niya ug nadala na hangtud karon kay tan-aw sa uban, uyab mi. Apan sa tinuod lang MU lang ang among relasyon kay never man ko nauyab niya.
Magsige mi og dungan og uli human sa among trabaho kay naa ra man mi dinhi sa Davao City nagtrabaho apan sa managlahi nga company.
Pulos mi "caring" sa usag-usa sama nianang tinuod gyud nga naay relasyon.
Gani tungod sa among pagkasuod, naa nay nahitabo namo. Maayo gani kay wa magbunga og bati kay amo ning gibuhat nga dunay panagang.
Di kaayo siya maghisgot bahin sa iyang uyab diri nako kay tua man sa gawas sa nasud. Apan ning ulahi, akong nasayran nga mouli ang iyang uyab sa Hulyo ug makigminyo na niya. Apan miingon si Cora nga wala siya mosugot kay di siya ganahan nga mawala ko sa iyang kinabuhi kay best of friends kuno mi.
Ang akong problema kay di ko gustong akoy mabasol unya kon magkagubot ang ilang relasyon pag-abot sa iyang uyab. Nasayud baya ang pamilya ni Cora nga wa mi relasyon niya kay duna na lagi siyay uyab. Unsa may angay nakong buhaton?
Harry
*****
Harry,
It's a high time na nga magklarohay mong duha ni Cora. Unsa man gyud mo, higala lang o uyab na? Mas nindot nang klaro imbis nga mutual understanding lang.
Apan nagtuo ko nga duna gyud moy pagbati sa usag-usa. Di man mahimo nga mahitabo ang sex kon way gugma. Busa pagsulti mo og tarong bahin niini.
Unfair sa iyang uyab nga tua sa layo nga naglaum nga sila ang magkadayon apan duna diay siyay katunga sa kasingkasing ni Cora.
Kinahanglan nga mohukom si Cora kon kinsa ninyo ang iyang unongan. Di puwedeng mangisda siya sa duha ka dagat. Usa ra gyud kaninyo ang magpabilin sa iyang kasingkasing ug kana maoy iyang pilion.
Kon ikaw ang iyang pilion, well and good. Apan kinahanglan nga iyang pasabton ang iyang uyab nga tua sa layo bahin sa iyang hukom aron nga pinaagi niini di na maghandom ang lalaki nga sila gihapon. Kay mas maayo nang prangkahan niya, kay mas sakit kon sa laing tawo niya kini mahibaw-an. Kinahanglan nga mohimo siya og hukom karon mintras duna pay igong panahon.
(Ipadala ang inyong suwat sa noytikyo@yahoo.com)
Noy Tikyo