DAVAO DEL SUR -- Gihisgutan na sa mga yanong molupyo sa probinsiya ang sunod nga piliay sa Barangay ug Sangguniang Kabataan (SK) diin himuon na sab kini sa 2020.
Daghan sa mga yanong molupyo ang wa makadawat sa resulta sa piliay human daghang namalit og boto ang matud pa nakalusot sa eleksiyon niadtong Mayo 14 bisan og wa kini nahimo sa ilang dapit.
Sumala ni Marissa (apilyedo gitago), molupyo sa Barangay Guihing, Hagonoy nga nadismaya siya sanglit napildi ang iyang gibotohan nga kandidato human nga wa kini namalit og boto sa ilang lugar.
Sa Barangay Zone 3, dakbayan sa Digos, milusot sab matud pa ang mga kandidatong namalit og boto sa kantidad P300 matag usa.
Alang ni Ariel, 22, nadismaya siya human adunay mga kandidato sa SK nga nakat-on na sa pagpamalit og boto inay nga sila ang mobag-o sa sistemang vote buying panahon sa piliay.
"Unsaon nato pag-ingon nga ang kabatan-onan ang pag-asa sa atong nasud kon sila mismo kaantigo na nga manikas o manlamang sa ilang kapwa," niya pa.
Sa Barangay Poblacion Uno, lungsod sa Bansalan, giingong miabot sa tag P500 ang palit sa pipila ka mga kandidato aron maseguro ang ilang kadaugan sa piliay.
"Midaug gyud sila kay dako man ang ilang gipagawas nga kuwarta unya matingala ta kay gamay ra man ang ilang honorarium unsaon man nila pagbawi sa gasto," sulti ni Roger, 45-anyos.
Nanaghap kini nga gahum ang giapas sa mga kandidatong namalit og boto aron ma-protektahan ang ilang mga negusyo o uban pang anomaliya nga gitagoan.
Hinuon, daghan ang miuyon nga tag duha na lang ka tuig ang termino sa SK ug mga opisyal sa barangay subay sa Republic Act 10592 aron nga mapul-an ang mga kandidato nga magsige og gasto sa pagpamalit og boto.
Samtang, gitataw ni Abogada Maria Febes Barlaan, provincial election supervisor nga mas maayong tumanon sa mga midaug nga kandidato ang ilang saad sa katawhan niadtong panahon sa kampanya sanglit wa mag-agad sa ilang termino ang ilang panerbisyo.
Giawhag sab niini ang tanang mikandidato nga mo-sumite na sa ilang Statement of Contributions and Expenditures (SOCE) una moabot ang deadline sa Hunyo 13.
Sa kasamtangan, nangandam na ang Comelec sa midterm elections sunod tuig sanglit magsugod na ang pagsang-at sa Certificate of Candidacy (CoC) sa Oktubre 1, tuig kasamtangan. (Orlando B. Dinoy)