BISAN kulang ang mga rekisitos sa mga bata mamahimo gihapon kining mapa-enroll apan mohimo lamang og promissory note sa pag-apas niini.
Sumala ni Department of Education (DepEd)-Davao Region spokesperson Jenelito Atillo nga dili mamahimong rason ang kakuwangon sa mga rekisitos sa bata aron dili siya ma-enroll.
"Bisan kuwang ang rekisitos sa usa ka bata, dawaton gihapon nato ni sila, mosaad lamang nga ipaapas nalang, diin dili gyud kini rason nga di na hinuon siya ma-enroll," ingon ni Atillo.
Giingon sab sa opisyal nga kung dunay gamay nga balanse sa Parent-Teacher Association (PTA) niadto ang usa ka estudyante di sab kini pugson og kolekta gumikan walay bayad ang magpatungha sa publiko.
"Gihangyo nato atong mga higala nga naglangkob sa PTA nga di pugson ang
mga ginikanan nga pabayaran ang balance sa ilang mga anak sa last school year, kay sa public school wala gayu'y bayad ang magpatungha," sulti ni Atillo.
Una nang gibutyag sa opisyal nga duna nay pre-enrollment ang nahitabo, apan kinahanglan gihapon mopatim-aw ang ginikanan ug estudayante sa mga tunghaan sugod kagahapong adlawa alang sa school year 2018-2019.
Ang klase magsugod karong Hunyo 4, 2018 human sa ipahigayong Brigada Eskuwela karong Mayo 28 hangtud Hunyo 2. (Jeepy P. Compio)