STA. CRUZ, Davao del Sur -- Gipangita na sa kapulisan ang uyoan nga naglugos sa iyang pag-umangkon sa Sitio Tacub, Barangay Zone.
Ang insidente nahitabo niadtong gabii sa Abril 19, 2018 apan sa miaging adlaw lamang kini nasumbong sa biktima nga si Mariel, 12-anyos, ngadto sa iyang inahan ug sa kapulisan.
Subay sa affidavit sa biktima nga gisumite sa piskalya sa Davao del Sur, gisaysay ni Mariel nga samtang nagtan-aw siya og salida nga Probinsyano sa balay sa iyang ig-agaw mikanaug siya kay nangihi ug nakita siya sa iyang uyoan nga si Renato (bansagon gitago), 38, dayon gitawag siya ug gipasaka sa kuwarto.
Pagsulod sa kuwarto gihigtan ang kamot sa biktima dayon gipanamastamasan.
Human sa hitabo, gipapauli ang biktima kinsa gihatagan og P40 ug gibaharan nga dunggabon kung motug-an sa hitabo.
Sa miaging adlaw, wala na kaagwanta ang biktima ug mitug-an sa iyang apohan, apan dihang giadto na sa otoridad ang balay sa suspek hugtanon kining milimod sa hitabo.
Gi-file na sa Sta. Cruz Municipal Police Station ang kasong lugos ubos sa regular filing didto sa korte.