GIKAN sa ikaunom nga puwesto, ang Cebu City miambak og lima ka ang-ang aron sakmiton ang temporaryonog liderato sa sa ikaduhang adlaw sa kompetisyon sa 2018 Philippine National Games (PNG) nga gipahigayon diha sa Cebu City Sports Center.
Base sa resulta sa alas 2:30 sa hapon sa PNG committee, ang Cebu City nakahagdaw na og pito ka gold medal, 11 ka silver medal ug siyam ka bronze nga igo na kaayong nakahulip sa dapit sa General Santos City, kinsa mius-os sa ikaduhang puwesto nga may unom ka gold medal, lima ka silver ug pito ka bronze.
Si Riza Jane Vallente, mihatag sa Cebu City sa ikapitong gold human kini mipatugbabaw sa women’s 400-meter hurdles Youth division.
Nag sunod sa General Santos City sa ikatulong luna mao ang Baguio City nga may tulo ka golds; lima ka silver ug tulo ka bronze medals. Naglingkod sa ikaupat nga lingkuranan ang Koronadal City nga may tulo ka gold ug tulo ka silver medals ug nagsunod ang Mandalayung City nga may tulo ka gold; duha ka silver ug duha ka bronze medals alang sa ika-limang puwesto.
Samtang ang Cebu Province naa karun sa ika-18 nga puwesto nga may usa ka gold, usa ka silver ug usa ka bronze..
Upat ka sports ang gibasihan sa medal tally kagahapon ug kini ang athletics, swimming, weightlifting ug cycling. (Clark Jude Suhot, CNU Comm Intern)